Edhe zyrtarisht Lionel Messi ka hedhur të zezën mbi të bardhë, duke nënshkruar kontratën e re që do ta mbajë të lidhur me Barcelonën deri në vitin 2021.
Pritjes së gjatë i erdhi fundi. Fotografia e shumë pritur tashmë është shkrepur, Lionel Messi e ka hedhur të zezën mbi të bardhë, shkruan Gazeta Express.
Argjentinasi ka nënshkruar një kontratë të re 4 vjeçare me Barcelonën, pas disa muajsh spekulime rreth së ardhmes së argjentinasit në “Camp Nou”.
Të gjitha klubet që tani e duan pesë herë fituesin e “Topit të Artë”, duhet të paguajnë 700 milionë euro, pasi kjo është klauzola e argjentinasit.
Numri një i Barcelonës, Josep Maria Bartomeu, e konsideron vetën me fat si dhe gjithë atë që e rrethojnë Messin.
“Jemi me fat që e kemi Messin. Do të vazhdojmë të shijojmë lojën e lojtarit më të mirë në histori të futbollit”, ka thënë Bartomeu pasi 30 vjeçari nënshkroi kontratën e re.
Mesi debutoi për Barcelonën 4,788 ditë me parë. Ai ka luajtur 602 ndeshje, duke shënuar 523 gola. Messi deri më tani ka fituar 30 trofe me Barcelonën. /Gazeta Express/
