Qendërmbrojtësi kroat i Liverpoolit, Dejan Lovren, ka thënë se ai nuk ka bërë asnjë vepër kriminale, pasi është akuzuar nga gjykatat kroate për dëshmi të rreme gjatë një procesi gjyqësor. Të njëjtën akuzë e ka edhe Luka Modrici.
Zdravko Mamic, i konsideruar si figura më e fuqishme e futbollit në Kroaci, u burgos në qershor të këtij viti për korrupsion, pasi u shpall fajtor për akuzën se kishte shpërlarë miliona euro gjatë kohës kur ishte drejtor ekzekutiv i Dinamo Zagrebit, transmeton Gazeta Express.
Edhe mesfushori i Real Madridit, Luka Modric, është paditur për të njëjtën akuzë. Për dallim nga Modrici, Lovren i ka mohuar këto akuza publikisht.
“Me indinjatë, i mohoj të gjitha akuzat. Për të gjithë ata që duanë të ma shkatërrojnë reputacionin tim dhe të familjes time, po ju tregoj se nuk do të keni sukses”, shkruan Lovreni në Instagram.
“Nuk kam kryer asnjë vepër penale. Jam krenar për jetën time, për çdo hap të jetës sime, për gjithçka që unë dhe familja ime kemi bërë”.
Kapiteni i Kroacisë, Modrici, u akuzua në mars për dëshmi të rremë, pasi që kishte gënjyer gjatë procesit gjyqësor për detajet e transferimit të tij nga Dinamo në Tottenham, në vitin 2008.
Ndërsa, Lovreni përballet me të njëjtën akuzë, pasi që edhe ai gënjeu për detajet e transferimit të tij nga Dinamo të Lyon, në vitin 2010.
Dënimi për dëshmi të rreme në gjyq është pesë vjet burg në maksimum. /Gazeta Express/
