Përkundër se nuk po marrin pjesë në mbledhjet e kabinetit, madje kanë paralajmëruar edhe tërheqjen nga Kuvendi, Qeveria e Kosovës po thotë se largimi i Listës Serbe ende nuk është definitiv.
Deputeti i Listës Serbe, Igor Simiq ditë më parë mohoi kategorikisht se partia e tij do të rikthehet në qeveri.
Madje kërkoi nga partitë që sa më shpejtë të caktojnë datën e zgjedhjeve.
“Qëndrimi që u tregua ndaj popullit serb dhe përfaqësuesve të serbëve atë ditë në Mitrovicë është një tregues i të Qeverisë ndaj Listës Serbe dhe serbëve. Ne në një qeveri të tillë nuk mund të kthehemi”, tha Simiq ditë më parë.
Zyrtarët serbë konfirmuan qëndrimet e tyre edhe në mbledhjet e fundit të qeverisë, ku nuk morën pjesë. Madje paralajmëruan tërheqje edhe nga Parlamenti.
Por nga qeveria duket se kanë ende shpresa që Lista Serbe mund të rikthehet.
Donjeta Gashi, zëdhënëse e qeverisë së Kosovës ka bërë të ditur për lajmi.net, se ende nuk po mendojnë për zëvendësimin e ministrave serbë.
Sipas saj, largimi i Listës Serbe nga qeveria ende nuk është vendim definitiv.
“Së pari, tërheqja e Listës Serbe nga Qeveria e Kosovës është çështje në proces që nuk ka marrë karakter definitive”, thuhet në përgjigje.
Gashi tutje ka folur edhe për emrin që pritet të jetë zëvendësues i Flamur Sefajt.
Zëdhnësja e qeverisë ka thënë se punët e ministrit Sefaj aktualisht po kryen nga zv/ministri.
“Dhe sa i përket Ministrisë së Punëve të Brendshme është çështje për të cilën partnerët e koalicionit vendosin dhe derisa të vendosin, këtë funksion e kryen zëvendësministri”, ka thënë Gashi.
Ajo është shprehur e bindur se të gjitha këto procese do të përmbyllen në afat optimal.
Lista Serbe u largua nga qeveria pas arrestimit të Marko Gjuriqit nga ROSU në Mitrovicën e Veriut.
Akualisht, qeveria e Kosovës ka katër ministra më pak pas shkarkimit të Flamur Sefajt nga Ministria e Brendshme.
Pa liderë aktualisht janë edhe ministria e Bujqësisë, e Administrimit dhe Pushtetit Lokal, dhe ajo për Kthim dhe Komunitete.
