Policia e Kosovës ka dhënë detaje për aksidentin hekurudhor që ndodhi sot rreth orës 13:55 në Ferizaj, ku një person ka humbur jetën.
“Rasti ka ndodhur kur treni transportues i cili ishte duke qarkulluar nga Ferizaj në drejtim të Hanit të Elezit ka goditur këmbësorin i cili ishte duke kaluar binarët e trenit”, thotë policia, transmeton Express.
Policia njofton se mjeku nga ekipi i emergjencës në vendin e ngjarjes ka konstatuar se “viktima I.M.(m/shtetas i Republikës së Shqipërisë, 41 vjeç) nga lëndimet e pësuara ka ndërruar jetë dhe me urdhër të Prokurorit të Shtetit, trupi i pajetë i viktimës dërgohet për obduksion në Institutin e Mjekësisë Ligjore”.
Hetuesit policorë janë duke zhvilluar hetimet lidhur me rastin.
