Ishte një iniciativë inkurajuese për një vend të njohur që nuk u jep grave platformë në jetën publike.
Megjithatë, kur Arabia Saudite deshi të mburrej me inaugurimin e Këshillit të Gruas në provincën al-Qassim, ata injoruan një gjë: gratë.
Fotografitë e publikuara nga takimi i parë të Këshillit të Grave në Qassim tregojnë 13 burra dhe as edhe një femër të vetme, shkruan BBC. Gratë qëndronin në një dhomë tjetër ku kishin shfaqur prezencën e tyre përmes videolidhjes.
Inaugurimi u kryesua nga Princi Faisal bin Mishal bin Saud, i cili tha se është krenar me hapjen e saj dhe se ky këshill është i pari i këtij lloji në Mbretërinë e tyre.
Këshilli udhëhiqet nga Princesha Abir bint Salman, bashkëshortja e bin Saudit, e cila poashtu nuk u pa në fotografi, transmeton KosovaPress.
