BBC ka folur me myslimanët e etnisë rohingya të cilët janë gjymtuar pasi kanë shkelur në mina tokësore derisa kanë ikur nga Myanmar (Burma).
Një djalosh 15-vjeçar është duke u trajtuar në Bangladesh pasi i ka humbur të dy këmbët, ndërsa një grua në të njëjtin spital ka thënë se kishte shkelur në minë pasi ishte gjuajtur me armë, transmeton Express.
Ajo zonë ishte minuar në vitet 1900-ta, por burimet nga Bangladeshi thonë se ushtria e Myanmar ka vendosur së fundmi mina të reja – një akuzë që zyrtarët e Myanmar e mohojnë.
Më shumë se 300.000 rohingya kanë ikur nga lufta brutale e forcave të sigurisë në Myanmar.
Dje, shefi i OKB-së për të drejtat e njeriut, Zeid Raad al-Hussein ka thënë se një operacion mizor ushtarak është duke ndodhur, të cilin e ka quajtur libër shembull për spastrim tenik.
Rohingya, një minoritet pa shtet kryesisht mysliman në Rakhinen e dominuar nga shumica budiste, ka një kohë të gjatë që përballet me persekutim në Myanmar, i cili thotë se ata janë emigrantë ilegalë.
Spitali i vizituar nga BBC është vërshuar nga njerëz me lëndime të marra nga minat, thonë doktorët.
Azizu Hague, 15-vjeçar, mbërriti pa dy këmbët. Vëllai i tij, në një spital tjetër, e ka vuajtur fatin e njëjtë, thotë nëna e tyre.
“Lëndimet e tyre janë aq të rënda saqë duket sikur ata janë të vdekur”, ka thënë ajo për BBC.
“Më mirë Zoti t’i marrë, po vuajnë aq shumë”, ka shtuar ajo. /Express/
