Universiteti i Prishtinës “Hasan Prishtina” ka nënshkruar marrëveshje bashkëpunimi me kompaninë Limak për vazhdimin e implementimit të programit të Limak Institutit për Shërbime Aeroportuale në Kosovë.
Në një njoftim për media thuhet se sipas kësaj marrëveshjeje të bashkëpunimit, kompania Limak do të bëjë trajnimin dhe certifikimin e studentëve për menaxhim aeroportual, trajnime këto të certifikuara ndërkombtarisht dhe të pranuara në më se 200 aeroporte në botë.
“Programi parasheh edhe programe të internshipeve për studentët pjesëmarrës si dhe punësim për studentët më të mirë në Limak Aeroportin Ndërkombëtar të Prishtinës “Adem Jashari” dhe / ose në institucione të ngjashme në botë”, thuhet në njoftim.
Rektori i UP-së, Marian Dema ka thënë se Universiteti i Prishtinës në vazhdimësi zhvillon programe me qëllim të përgatitjes së mëtutjeshme akademike dhe profesionale të studentëve.
“Instituti i Limak për Shërbime Aeroportuale, programi ekstra-kurrikular i organizuar nga Universiteti i Prishtinës dhe kompania Limak, organizohet në bashkëpunim me Institutin ENAC nga Franca, Universitetin Bogazici në Turqi dhe Ministrinë e Arsimit, Shkencës dhe Teknologjisë në Republikën e Kosovës. Përmes programit, studentët kanë mundësi të zhvillojnë kapacitetet akademike dhe profesionale si dhe përgatiten për tregun e punës”, vazhdon njoftimi.
Në anën tjetër, drejtori ekzekutiv në Limak Aerportin Ndërkombëtar të Kosovës “Adem Jashari”, tha se Limak ASI paraqet mundësi për studentë të talentuar që kanë dëshirë të bëhen pjesë e kësaj industrie.
30 studentë në vitin e fundit të studimeve të disa fakulteteve të Universitetit Publik të Prishtinës, marrin pjesë në program në baza vjetore ndërsa deri më tani, Instituti ka bërë punësimin e më se 45 studentëve të Universitetit të Prishtinës nga dy grupet e para të pjesëmarrësve. Përgjatë programit, studentët vizitojnë institucione të ndryshme të fushës së aviacionit dhe Aeroporte në Turqi dhe Francë. /KosovaPress/
