Në terminin e orës 20:30 janë zhvilluar tri ndeshje të javës së 30-të të kampionatit të Spanjës në futboll. Deportivo dhe Granada luajtën pa gola, Osasuna fitoi si mysafir kundër Alaves, sikurse edhe Malaga kundër Gijon.
Në pjesën e parë të takimit Deportivo – Granada, rastin më të mirë për të shënuar e pati Andone, i cili në minutën 39 goditi me kokë pranë portës kundërshtare. Deportivo në minutën 67 pati rast të mirë për të shënuar, kur Gama goditi fuqishëm, por topi kaloi pranë shtyllës së majtë.
Në minutën 77 u akordua penallti për Deportivon, por goditjen e Borges nga pika e bardhë e mbrojti portieri Ochoa. Në takimin tjetër Alaves – Osasuna 0:1, pjesa e parë përfundoi pa gola, ndërsa ekipi i Osasunës rrezikoi dy herë përmes Leon, në minutat 17 dhe 23, por në të dyja rastet reagoi mirë portieri i Alaves, Pacheco. Në vazhdim të takimit, në minutën 52 Osasuna serish ishte pranë shënimit, por topi pas goditjes së Cuevasovo përfundoi pranë shtyllës së majtë. Alaves rrezikoi në minutën 61 përmes Romero, por goditjen e tij e priti portieri i Osasunës, Sirigu. Berenguer, i cili hyri në pjesën e dytë, shënoi golin fitimtar për Osasunën në minutën 89 dhe i siguroi tri pikë ekipit të tij.
Edhe Gijon pësoi humbje si vendës kundër Malaga 0:1. Vendësit rrezikuan qysh në minutën 30 përmes Traore, por goditjen e tij e priti portieri Kameni. Mysafirët ndërkaq kaluan në epërsi me golin e Ramirez në minutën 40.
Malaga ka mundur të dyfishojë shifrat përmes Santos në minutën 42, por goditja e tij nuk ishte precize. Në pjesën e dytë, mysafirët serish rrezikuan përmes Fornals në minutën 49, por goditja e tij përfundoi mbi portë.
Rast të mirë për Malagën pati Keko në minutën 70, por nuk arriti të shënojë.
Në tabelë Real Madrid me 71 pikë dhe një ndeshje më pak të zhvilluar, pason Barcelona me 69, Atletiko Madrid 61, etj./KosovaPress/
