Zlatan Ibrahimovic ka sugjeruar se mund të transferohet nga Manchester United në ligën MLS në Shtetet e Bashkuara.
Sulmuesi suedez është i lënduar momentalisht pas një dëmtimi në gju dhe ka luajtur vetëm shtatë ndeshje në të gjitha garat deri tani këtë sezon.
Kontrata e tij me Unitedin skadon në verë dhe tani për tani është e paqartë nëse atij do t’i ofrohet zgjatje e kontratës nga skuadra e Jose Mourinhos.
36-vjeçari është duke i shqyrtuar opsionet dhe tani ka pohuar se mund të kalojë në ligën kryesore amerikane, pasi e ka shfaqur admirimin që ka për Los Angeles.
“Nuk e dija se disa lojtarë suedezë kanë shkuar në MLS”, ka thënë Ibrahimovic për Daily Telegraph.
“Kjo do të thotë se është joshëse të luash në Shtetet e Bashkuara”, ka shtuar ai.
“Los Angeles është qytet i mirë dhe kam qenë atje shumë herë për pushime. Është relaksues. Mendoj se të gjitha janë thashetheme [për të ardhmen time]. Kur luaj dhe kur nuk luaj, janë thjesht thashetheme. Kjo është gjë e mirë, sepse do të thotë se jetoj”, theksoi Ibra.
