BEOGRAD – Kryeministri serb, Aleksandar Vuçiq, priti ambasadorin e Shteteve të Bashkuara, Kyle Scott, i cili i dorëzoi urimin e Presidentit të SHBA-së, Donald Trump.
Trump-i, në letrën e urimit, ndër të tjera, ka shkruar se Shtetet e Bashkuara do të vazhdojnë të mbështesin përpjekjet e Serbisë për të investuar në forcimin e sundimit të ligjit, modernizimin e ekonomisë dhe përpjekjet për të mbetur një shtyllë e stabilitetit në Ballkanin Perëndimor, transmeton agjensia Tanjug.
Në urimin e Trump-it thuhet:
Ju lutem pranoni urimet e mia të përzemërta për zgjedhjen si President i Serbisë.
“Zgjedhjet u mbajtën në një moment vendimtar për Serbinë. Unë pres forcimin e mëtejshëm të bashkëpunimit në mes vendeve tona. Unë jam i kënaqur që të kemi mundësinë për të punuar në prioritetet e përbashkëta, sidomos në forcimin e mëtejshëm të marrëdhënieve bilaterale dhe ekonomike, avancimin e integrimit evropian të Serbisë, normalizimin e marrëdhënieve me Kosovën, si dhe pajtimin në rajon”.
Tramp-i e ka porositur Vuçiqi-in më tutje:
“Ne do të vazhdojmë të mbështesim përpjekjet e Serbisë për të investuar në forcimin e sundimit të ligjit, modernizimin e ekonomisë dhe përpjekjet për të mbetur një shtyllë e stabilitetit në Ballkanin Perëndimor. Gjithashtu, ka çështje të pazgjidhura në marrëdhëniet tona dypalëshe, të cilat mund të zgjidhen vetëm me angazhimin e vazhdueshëm të udhëheqësve serbë në nivelin më të lartë . E ardhmja mbart sfida dhe mundësi”.
Ai tha, gjithashtu, se duke shënuar 135-vjetorin e marrëdhënieve bilaterale diplomatike mes vendeve tona, Shtetet e Bashkuara do të bëjnë promovimin e objektivave të përbashkëta, do të promovojnë stabilitetin global dhe arritjen e paqes dhe prosperitet.
