Interi duhet ta shesë sulmuesin e vet Lautaro Martinez dhe ta zëvendësojë atë me dyshen Alexandre Lacazette nga Arsenali dhe Edinson Cavani nga Paris Saint-Germain, sipas Antonio Cassanos, ish-yllit të Italisë.
Cassano beson se Interi do të përfitojë shumë nga shitja e Martinezit në Barcelonë, transmeton Gazeta Express.
Barcelona ka shfaqur interesim të madh për sulmuesin argjentinas dhe ish-ylli i Interit Cassano beson se shitja e 22-vjeçarit do t’i jepte mundësi të madhe zikaltërve për të investuar mençur.
“Lautaro është shumë i mirë, por unë do ta shisja atë. Ata e blenë atë për 20 milionë euro dhe mund ta shesin për mbi 100 milionë euro”, tha Cassano.
“Apo mund ta shesin për 70 apo 80 milionë euro plus ta marrin Arthurin. Pastaj, Interi duhet ta transferojë Cavanin, të cilit i mbaron kontrata me PSG-në dhe uruguaiani do të ishte sulmues i përkryer për Conten”, shtoi ai.
“Për më tepër, Interi do të fitojë më shumë para nga shitja e Mauro Icardit dhe me ato para duhet ta blejë Lacazette nga Arsenali”, vazhdoi ai.
“Lautaro do të bëhet edhe më i mirë, por unë do t’i thosha: ‘Ishte kënaqësi’”, përfundoi ai. /Gazeta Express/
