Navas nuk do të luajë kundër Atleticos, ndërsa Carvajal i ka lënë anash problemet me zemër dhe do të zbresë nga minuta e parë të shtunën në stadiumin “Wanda Metropolitano”.
Sipas asaj që raporton “Cadena Ser”, portieri Keylor Navas, nuk ia ka dalë të rikuperohet me kohë dhe do të mungojë në derbin e së shtunës kundër Atletico Madridit.
Por, lajmi i mirë për Zinedine Zidanen është kthimi i Dani Carvajal, pavarësisht se ditë më parë u raportua se mbrojtësi spanjoll nuk është gati për derbi pas problemeve me zemër që e la jashtë fushave për pothuajse dy muaj.
“Keylor Navas nuk do të jetë plotësisht i gatshëm për derbin e së shtunës, ndërsa Dani Carvajal do të jetë titullar”, raporton “Cadena Ser”.
Derbin mund ta humbasë edhe Luka Modric që nuk u stërvit me skuadrën të enjten dhe mbetet të shihet nëse do ta bëjë një gjë të tillë të premten, që do të jetë edhe stërvitja e fundit para ndeshjes në stadiumin “Wanda Metropolitano”. /Gazeta Express/
