Zyrtarë nga Shërbimi Klinik dhe Spitalor i Kosovës sot kanë marrë vendim që ta largojnë nga puna Drejtorin i Repartit të Urologjisë në QKUK, Rexhep Kasumaj, i cili të premten është arrestuar nga policia pasi dyshohet se i kërkoi 100 euro ryshfet nga një pacient.
Lajmin për largimin e Kasumajt e kanë bërë të ditur për Gazetën Express zyrtarë nga zyra e drejtorit të SHSKUK’së, Basti Sejdiu.
Ky vendim do të jetë në fuqi deri në vendimin e komisionit disiplinor te QKUK’së. Ndërkohë në vend të Kasumjat, ushtrues detyre i Urologjisë është emëruar dr. Sabit Mehmeti.
“Zyra e drejtorit të përgjithshëm e Shërbimit Spitalor dhe Klinik Universitar e Kosovës, ju njofton se dretori i përgjithshëm i SHSKUK, ka marrë vendim për largim të përkohshëm nga puna të dr. Rexhep Kasumaj. Në vend të tij, ka emëruar ud. Drejtor, dr. Sabit Mehmeti”, thuhet në përgjigjen që zyrtarë të QKUK’së i kanë dhënë të hënën Gazetës Express.
Kujtojmë se Kasumaj u arrestua pasi qe i kishte kërkuar para një pacienti për t’u operuar pa rend.
“Mund të ju konfirmojmë se sot me datë 06.07.2018 rreth orës 10:20, Drejtoria për Hetimin e Krimeve Ekonomike (DHKEK) pas pranimit të një informacioni nga një qytetar, ka ndërmarr disa veprime policore në drejtim të hetimit të një personi, mbi dyshimin e bazuar të përfshirjes në veprën penale Marrje e Ryshfetit. Si rezultat i veprimeve të shpejta të hetuesve policore, është arrestuar në flagrancë i dyshuari M/Sh/K, i cili dyshohet se nga një qytetar ka marrë para për ti kryer shërbime mjekësore”, ka sqaruar policia.
Hetuesit e DHKEK, në cilësi të provave materiale kanë konfiskuar paratë, ndërsa pas intervistimit me urdhër të Prokurorit i dyshuari është dërguar ne Qendrën e Mbajtjes. /Express/
