Në finalizim të operacionit të koduar “BAZA”, policia e Tiranës ka zbuluar një bazë që furnizonte me armë grupet kriminale dhe personat që merren me veprimtari kriminale.
Në pranga u vu shtetasi Ramazan A, 64 vjeç, banues në Tiranë (i dënuar më parë për “Prodhim dhe mbajtja pa leje e armëve dhe municionit luftarak).
Ky shtetas kishte përshtatur banesën e tij në një bazë e cila iu shërbente grupeve kriminale apo personave që merren me veprimtari kriminale për furrnizim me armë zjarri.
Gjatë kontrollit të ushtruar u gjetën dhe u sekuestruan në cilësinë e provës materiale: 3 armë zjarri (automatik model 56 dhe dy pushkë gjysmë automatike). 4 armë zjarri të çmontuara (3 snajpera dhe 1 armë sportive), dy armë sportive dhe municion luftarak i llojeve të ndryshme, silenciator dhe pjesë të ndryshme armësh zjarri.
Materialet iu referuan Prokurorisë së Rrethit Gjyqësor Tiranë në ngarkim të shtetasit të lartpërmendur për veprat penale të “Mbajtja pa leje e armëve lufarake dhe e municioneve” dhe “Prodhimi dhe mbajtja pa leje e armëve të ftohta”, parashikuar nga nenet 278 dhe 279 të Kodit Penal.
