Lëvizja Vetëvendosje ka dorëzuar ankesën në Gjykatën Supreme ndaj vendimit që ka marr Paneli Zgjedhor për Ankesa dhe Parashtresa, i cili ka vendosur që të rinumërohen votat për Prishtinën dhe Prizrenin.
Nënkryetari i Lëvizjes Vetëvendosje, Dardan Sejdiu tha se konsiderojnë se këto vendime përveç që janë të pabaza janë edhe të motivuara politikisht.
Sipas tij vendimi i PZAP për rinumërim të tërësishëm për Prishtinën ka ardhur në bazë të një kërkese nga LDK-ja duke u bazuar në numër të madh të fletëvotimeve të pavlefshme dhe fletëvotime të zbrazëta.
E për këto dy pretendime të LDK-së, Sejdiu tha se janë të pabaza pasi që numri i fletëvotimeve është më i ulti ndonjëherë. Sejdiu ka akuzuar PZAP duke e konsideruar të ngarkuar politikisht.
“Kemi ardhur në një situatë ku PZAP, si duket është e ngarkuar politikisht dhe ka marr vendime politike e jo vendime që bazohen në argumente dhe bazë”, tha ai.
Sejdiu u shpreh i bindur që Gjykata Supreme nuk do të bëjë gabim të tillë si PZAP dhe dhe do të anuljë vendimin duke vazhduar numërimin e votave më kusht.
Po ashtu njëjtë e ka konsideruar edhe rastin e Prizrenit ku është ankuar PDK-ja.
Sejdiu tha se nuk do të pranojnë asnjë rezultat i cili vjen si rezultat i rinumërimit të cilin e quajti manipulim me sistemin e drejtësisë dhe votën e qytetarit.
Ndërsa deputeti Ismajl Kurteshi tha se procesi zgjedhor ka qenë në rregull dhe këtë nuk e thotë vetëm Vetëvendosje por edhe të gjitha subjektet tjera politike dhe vëzhguesit ndërkombëtarë.
Ai është shprehur i bindur se gjykata supreme në bazë të fakteve do ta merr vendimin dhe do t’i refuzojë këto kërkesa që janë puro politike dhe që çojnë drejtë një destabilizimi të vendit./KosovaPress/
