Presidenti i Serbisë, Aleksander Vuçiq , ditë më parë në një intervistë për Reuters, ka paralajmëruar që Franca dhe Gjermania, do të ndërmarrin iniciativa në një të ardhme të afërt sa i përket dialogut të Brukselit ndërmjet Prishtinës dhe Beogradit.
Ai nuk ka dhënë shumë shpjegime lidhur me këtë përfshirje të dy superfuqive evropiane në procesin e dialogut, megjithatë në një intervistë të dhënë për Tv Happy, ka paralajmëruar se do të takohet në korrik me presidentin e Francës, Emanuel Makron, ndërsa në muajin prill do ta takoj në Kinë , Vladimir Putinin, të cilin e ka konsideruar si një takim shumë të rëndësishëm.
Ai ka thënë se do t’i realizojë këto takime nëse nuk jep dorëheqje ose nëse nuk vritet nga dikush.
“Makroni do të vij në korrik, kurse unë para kësaj vizite, nëse gjithçka është në rregull dhe nëse nuk jap dorëheqje ose nuk vritem, do ta kem rastin që në Kinë me 25 prill të takohem me presidentin kinez, dhe me Vladimir Putinin, që besoj se do të jetë një takim shumë i rëndësishëm”, ka thënë Vuçiq, transmeton Gazeta Express.
Ndërkohë ai gjithashtu ka treguar se është një pritje të një telefonate nga Amerika, kur është pyetur nëse pritet që të intensifikojë raportet me shtetin që udhëhiqet nga Donald Trump.
“Po e pres ftesën nga Amerika, në momentin që e marrë do të shkoj” , ka thënë ndër të tjera presidenti i Serbisë.
Ndër të tjera në këtë intervistë ka folur edhe për bllokimin e dialogut të Brukselit duke thënë se nuk e kupton pse Prishtina po dëshiron që të ‘blejë kohë’, duke shtuar që pala kosovare nuk do të kthehet në dialogun e Brukselit, derisa të skadojë mandati i ndërmjetësueses Federica Mogherini./GazetaExpress/
