Lëvizja Vetëvendosje ka paralajmëruar protestë gjithëpopullore më 1 shtator në kundërshtim të ratifikimit të marrëveshjes për Demarkacion me Malin e Zi.
Në një konferencë për medie, kryetari i VV-së, Visar Ymeri, ka thënë se edhe pas kërkesave për mos-ratifikim të kësaj marrëveshje nga VV-ja, qeveria është e vendosur për një gjë të tillë, andaj siç ka thënë ai, edhe opozita është e vendosur që ta kundërshtoj këtë marrëveshje me protesta.
“Ky regjim i korruptuar përkundër gjithë këtyre po paraqitet i vendosur në ratifikimin e kësaj marrëveshje dhe natyrisht që vendosmëria e këtyre të korruptuarve, e këtij sistemi të instaluar të kapur të shtetit, do të përballet me vendosmërinë edhe më të madhe të qytetarëve ët Republikës së Kosovës. Poshtërsia e tyre do të përballet me krenarinë tonë edhe më të madhe, andaj sot ne po e shpallim organizimin tonë të një proteste gjithëpopullore më datë 1 shtator në ditën kur kuvendi ka vendosur që në rend dite ta ketë diskutimin dhe ratifikimin e marrëveshjes për demarkacion me malin e zi”, tha Ymeri.
I pyetur nëse do të bashkohen në protestë edhe partitë opozitare, Ymeri ka thënë se të gjithë janë të hapur t’i bashkohen protestës.
Ndërsa ka shtuar se në protestë do të jenë edhe deputetët e VV-së, të cilët sipas tij do të protestojnë brenda Kuvendit.
Por, nëse do të ketë dhunë ose jo në protestë, Ymeri ka thënë se dhuna gjithmonë është shkaktuar nga Policia e Kosovës, andaj sipas tij varet nga ta nëse do të përdorin dhunë ose jo.
Kurse, nënkryetarja e VV-së, Fatmire Kollçaku, tha se nuk mund të pritet të luftohet krimi e korrupsioni nga njerëz të cilët po e tronditin vendin me përgjime të pazareve me shtetin.
“Vlen të ritheksohet e jo vetëm sot në këtë konferencë por kudo kur bisedojnë dy qytetarë të ndershëm të Kosovës se afera pronto që këto ditë po e tronditë vendin tonë, është treguesi më i mirë që kushti kryesor luftimi i krimit dhe korrupsionit që është jo vetëm për liberalizimin e vizave, që është dhe do të mbetet kushti kryesor por edhe për ecjen e këtij vendi përpara nuk ka mundësi ë të luftohet nga këta politikanë të korruptuar të cilët përveç përgjimeve që jemi dëshmitarë ti dëgjojmë jo vetëm që po bëjnë pazare me postet më të rëndësishme të republikës por ata po mendojnë që kështu mund të bëjnë pazare edhe me territorin e vendit tonë dhe të bëjnë pazare me integritetin dhe sovranitetin e vendit”, tha Kollçaku.
Protesta e Vetëvendosjes pritet të mbahet më 1 shtator ditën kur Kuvendi i Kosovës e ka caktuar datën e mbajtjes së mbledhjes së Kuvendit, në rend dite të të cilës është edhe pika për miratimin e ligjit për caktimin e vijës kufitare me Malin e Zi.
