Kryetari i Kuvendit të Kosovës, Kadri Veseli, ka kundërshtuar iniciativën për rritjen e pagave dhe mëditjeve për deputetët.
Veseli përmes Facebook-ut, ka thënë se është kategorikisht kundër rritjes së pagave për deputetët e Kuvendit, pasi sipas tij, fillimisht duhet që qytetarëve të vendit t’u përmirësohet standardi i jetës.
“Sapo dëgjova për planet e disa deputetëve për rritje të rrogave të tyre. Jam kategorikisht kundër rritjes së rrogave të politikanëve. Kur popullit t’ia rrisim rrogat dhe standardin e jetës, atëherë politikanët le të mendojnë për rrogat e veta”, ka shkruar Veseli në Facebook.
Ndryshe, anëtarët e Komisionit Parlamentar për Buxhet dhe Financa kanë aprovuar Kornizën Afatmesme të Shpenzimeve (KASH) për vitin 2018-2020 për Kuvendin e Kosovës./KosovaPress/
