Ukraina i ka dhënë fund mbajtjes në fuqi ligjit të luftës në rajonet lindore dhe veriore të vendit. Kjo masë ishte në fuqi në dhjetë rajone pranë Detit të Zi, kufirit me Rusinë dhe me Moldavinë. Ukraina e kishte futur në fuqi këtë ligj pas rrëmbimit të tri anijeve ukrainase me 24 anëtarë të bordit nga Rusia.
Rusia kishte thënë se shpreson që shtetet perëndimore ta bindin Ukrainën që të mos bëjë ndonjë provokim. Gjatë kohës sa kjo masë ishte në fuqi, ushtria ukrainase ka qëndruar në gjendje gatishmërie dhe të përgatitur kanë qëndruar edhe forcat rezervë.
Si pjesë e këtij ligji ishte edhe ndalesa e hyrjes në Ukrainë për meshkujt e moshës 16 deri 60-vjeçare. Presidenti i Ukrainës, Petro Poroshenko, kishte deklaruar para disa ditësh se nuk planifikon që ta zgjasë kohën e mbajtjes në fuqi të ligjit të luftës në rast se nuk ka ndonjë sulm të shkallës së lartë nga Rusia.
Muajin e kaluar, forcat detare të të dy vendeve u përleshën pranë brigjeve të Krimesë, e cila është territor i kontestuar që u pushtua nga Rusia në vitin 2014. Rusia hapi zjarr kundër anijeve ukrainase dhe më vonë i rrëmbeu me arsyetimin se kanë hyrë ilegalisht në ujërat ruse, shkruan “BBC”, transmeton Gazeta Express.
