Së paku 23 persona kanë humbur jetën për shkak të reshjeve të mëdha të shiut dhe vërshimeve në pjesën jugore të Malavit, ndërsa 11 njerëz janë shpallur të zhdukur.
Ekipet e kërkimit dhe të shpëtimit janë angazhuar për ta ndihmuar popullsinë e prekur nga këto vërshime. Raportohet se rreth 110 mijë njerëz janë prekur nga gjendja e jashtëzakonshme e motit. Kështu ka deklaruar ministri për Siguri Kombëtare i këtij shteti, Nicholas Dausi.
Kompania që është pëgjegjëse për furnizim me energji ka njoftuar se 270 nga 320 megavatët e energjisë elektrike nuk mund të prodhohen në kushtet e tanishme. Kjo kompani ka njoftuar se punëtorët e saj janë duke punuar për ta kthyer furnizimin me rrymë dhe për t’i pastruar hidrocentralet.
Shteti i Malavit, i cili ndodhet në pjesën juglindore të Afrikës, e siguron energjinë elektrike përmes hidrocentraleve në lumin Shire. Ekonomia e këtij vendi varet shumë nga donacionet e huaja, shkruan “Reuters”, transmeton Gazeta Express.
