Në aksidentin që ndodhi dje në rrugën Prishtinë- Gjilan, gjegjësisht në fshatin Mramor humbën jetën katër persona kurse gjashtë të tjerë janë lënduar, në mesin e tyre edhe ambasadorja turke Kivilcim Kiliç.
Viktimat janë Agron Shala, 22 vjeç, Arife Shala, 88 vjeç dhe Elfete Rashiti, 65 vjeç. Policia sot njoftoi se ka humbur jetën edhe personi i katërt.
Daja i Agronit, thotë se në aksidentin që ndodhi dje, ishin tre vetura të kësaj familje që kishin shkuar në një të pame tek familjarët e tyre.
“Aksidenti ka ndodhur duke u kthyer nga e pamja tek gjyshja e Agronit. Ishin tre vetura të kësaj familje ku është aksidentuar me eskortën e Turqisë”, u shpreh daja i të ndjerit.
Njëra veturë po voziste 150km/h momentin e aksidentit, rrëfehen familjarët e viktimave.
“Vetura ka qenë me shpejtësi 150km/h, kur ka hyrë në tejkalim të veturës së diplomates Kivilcim Kiliç, pastaj vetura tjetër e tipit Audi ka hyrë në mes e i ka goditur për prapa të aksidentuarit”, ka thënë daja i Agronit, për arbresh.info.
“Varrimi i të ndjerëve do bëhet nesër pas namazit të ikindisë, për shkak të autopsisë që do t’i presim sot”, tha ai.
Ai në fund apeloi popullatën që të vozisin me kujdes.
