Kryeministri i Kosovës në largim, Isa Mustafa me bashkëpunëtorë, ka qëndruar sot në Mitrovicë për t’u njohur nga afër me ecurinë e zhvillimit të punimeve në renovimin e stadiumit olimpik ‘Adem Jashari’.
Ministri në largim, Kujtim Shala, u shpreh i kënaqur me punimet e deritashme, për çka tha se është zgjidhur problemi i garimit të klubeve kosovare për garat ndërkombëtare.
Sipas tij, MKRS-ja së bashku me Federatën e Futbollit do të bëjë kërkesë që UEFA të sugjeroj dhe kushtet shtesë, në mënyrë që brenda dy tre muajve të plotësohen standardet për stadium të kategorisë së katërt.
“Punimet janë verifikuar, janë testuar sistematikisht dhe përfundimisht janë pranuar në UEFA dhe FIFA, që do të thotë se ne praktikisht kemi zgjidhur problemin e garimit të klubeve tona për garat ndërkombëtare. Poashtu kemi zgjidhur problemin e ndeshjeve miqësore të kombëtares së Kosovës, ndërkaq bashkë me Federatën e Futbollit do të bëjmë kërkesë që UEFA të sugjeroj dhe kushtet shtesë në mënyrë që brenda dy tre muajve të plotësojmë edhe standardet për një stadium të kategorisë së katërt”, ka thënë Shala.
Ndërsa, kryetari i Mitrovicës, Agim Bahtiri, duke falënderuar ministrin Shala dhe qeverinë për mbështetjen e vazhdueshme, tha se i është gëzuar tej mase këtij investimi.
“Ne i gëzohemi këtij investimi, këtij suksesi, falënderoj kryeministrin, por edhe ministrin i cili ka bërë të pamundurën, sepse na ka përkrahur çdoherë, ndërsa tani ne po i shohim rezultatet”, theksoi Bahtiri. /KP
