Shpërndarja e Kuvendit dhe zgjedhjet e parakohshme në Maqedoni kanë përplasur deputetët.
Shefi i grupit parlamentar të LSDM-së, Goran Sugarevski, tha se shumica parlamentare po tenton të ikë nga mbajtja e votimeve duke vonuar shpërndarjen e institucionit ligjvënës.
“VMRO-DPMNE dhe BDI mashtruan dje qytetarët se do ta miratonin buxhetin në orën 17:00, ndërsa në orën 19:00 do të miratonim shpërndarjen e Kuvendit, por në seancën e sotme përmes dhjetëra pikave kërkojnë strehimin e militantëve partiakë nëpër institucione shtetërore. Pra, ju dje ikët nga zgjedhjet dhe shmangët propozimin e opozitës për shpërndarjen e kuvendit”, deklaroi Goran Sugarevski, deputet i LSDM-së.
Por, deputetët e VMRO-DPMNE-së dhe BDI-së, iu kundërpërgjigjen akuzave të deputetit opozitar, duke thënë se është pikërisht LSDM-ja ajo që vazhdimisht ikë nga zgjedhjet.
“Menjëherë pas miratimit të buxhetit, gjithë deputetët e koalicionit “Për Maqedoni më të mirë” do të votojnë për shpërndarjen e Kuvendit dhe fillon numërimi mbrapsht për zgjedhjet, ku ju do të mësonin leksionin”, tha Ilija Dimovski, deputet i VMRO-DPMNE-së.
“Zotërinj, ju kërkuat dy herë të shkoni në zgjedhje dhe ne firmosëm iniciativën që të shpërndahet parlamenti, por më pas u ankuat në gjithë botën që zgjedhjet të mos mbahen dhe për këtë nuk jemi ne fajtorë”, u shpreh Talat Xhaferi, deputet i BDI-së.
Debatet rreth zgjedhjeve u zhvilluan një ditë pasi kryeparlamentari Trajko Veljanovski refuzoi propozimin e opozitës që Kuvendi të shpërndahet dje dhe njoftoi se për këtë çështje do të vendoset në seancën plenare të caktuar për më 17 tetor.
