Gjatë 24 orëve të kaluara, në Rusi janë shënuar 10,102 raste të reja të koronavirusit, rreth 480 më pak se në ditën paraprake.
Kështu, numri i përgjithshëm i të infektuarve në vendin me sipërfaqen më të madhe në botë shkoi në 155,370 dhe shifra është duke u rritur më të madhe ditëve të fundit, shkruan “The Guardian”, transmeton Gazeta Express.
Përpos të infektuarve, gjatë kësaj periudhe u shënuan edhe 95 viktima të reja dhe numri i përgjithshëm i të vdekurve shkoi në 1,451.
Krahasuar me vendet e tjera, Rusia ende ka shifër të ulët të viktimave, por shqetësues mbetet shifra e të infektuarve, që ditëve të fundit është rritur me nga 10 mijë.
Shumica e rasteve janë shënuar në Moskë, ku spitalet po përballen me vështirësi për të siguruar shtretër për të gjithë pacientët.
