Drejtori i Shërbimit Spitalor dhe Klinik Universitar të Kosovës, Basri Sejdiu ka njoftuar se janë në gatishmëri të plotë për të ofruar ndihmë për të prekurit pas tërmeteve që kanë goditur sot në orët e para të mëngjesit Shqipërinë.
Sejdiu ka shkruar se ka kontaktuar drejtorin e Qendrës Spitalore Universitare të Tiranës dhe drejtoreshën e Spitalit të Durrësit për t’iu shprehur gatishmërinë për ndihmë.
Sejdiu ka thënë po ashtu se gjatë bisedës ata i kanë konfirmuar se për momentin nuk kanë nevojë për ndihmë nga ekipet mjekësore dhe se do të mbesin në kontakt.
Basri Sejdiu:
Sapo bisedova në telefon me drejtorin e Qendrës Spitalore Universitare të Tiranës, z. Enkel Joti, dhe drejtoreshën e Spitalit të Durrësit, znj. Diri Kertusha, të cilëve ju shpreha gatishmëri për ndihmë nga Shërbimi Spitalor dhe Klinik Universitar i Kosovës, pas tërmeteve që kanë goditur sot Shqipërinë.
Gjatë bisedës, ata më konfirmuan se për momentin nuk ka nevojë për ndihmë nga ekipet mjekësore nga SHSKUK dhe se do të mbesim në kontakt në rast nevoje.
Ekipet tona vazhdojnë të jenë në gjendje gatishmërie që në rast nevoje të dalin në ndihmë.
