Ministria e Punëve të Jashtme ka njoftuar se Qeveria e Kosovës i ka refuzuar kërkesën e Presidentit serb Tomislav Nikoliq që ta vizitojë Kosovën të premten, me rastin e Krishtlindjeve ortodokse.
Lajmin se Nikolic nuk vjen për ta vizituar komunën serbe të Kosovës, Shtërpcën e kanë dhenë edhe mediat serbe por që sipas tyre “arsyet e anulimit të vizitës janë të panjohura”.
Ky është njoftimi i plotë i MPJ’së:
Qeveria e Kosovës ka marrë vendim për të refuzuar kërkesën e Presidentit të Serbisë, Tomislav Nikoliq dhe zyrtarëve të tjerë të lartë të Qeverisë së Serbisë për ta vizituar nesër komunën e Shtërpcës në Kosovë.
Refuzimi vjen pas vonesës për të deponuar me kohë kërkesën për vizitë në Kosovë ashtu siç parashihet me marrëveshjen për lejimin e vizitave të zyrtarëve të lartë ndërmjet dy shteteve.
Qeveria e Kosovës konsideron se sjelljet e fundit të Serbisë dhe deklaratat e njëpasnjëshme janë kundër frymës së bashkëpunimit ndërshtetëror dhe të arriturave të dialogut për të ndërtuar ura të shëndosha bashkëpunimi në mes dy shteteve dhe popujve.
Po ashtu, ato janë kundër interesit të qytetarëve serbë të Kosovës të cilët kanë vendosur të jetojnë në Kosovë.
