Kaosi i shkaktuar mbrëmë në festivalin e birrës po dyshohet se ka ndodhur pasi një i dehur ka shtënë me armë. Policia ende nuk e ka arrestuar të dyshuarin derisa hetimet po i vazhdojnë. Për situatën e krijuar në Kryeqytet ende s’ka asnjë reagim prej udhëheqjes komunale, të cilët deklarohen edhe për ngjarje që ndodhin jashtë Republikës.
Festivali tradicional i birrës në Prishtinë nuk ka kaluar ashtu siç kishin pritur organizatorët dhe qytetarët.
Numër i madh i qytetarëve ishin mbledhur mbrëmë në sheshin “Zahir Pajaziti” për të pirë e për të vallëzuar, por rreth orës 23:00 dikush shtiu me armë zjarri dhe gjendja gati sa eskaloi.
Daut Hoxha nga Policia e Kosovës tha për Gazetën Express se sipas hetimeve dhe intervistave që kanë zhvilluar një person i dehur ka shtirë me armë zjarri, por plumbat nuk kanë lënduar asnjërin nga pjesëmarrësit e Beerfest’it.
“Sipas hetimeve të deritashme, dyshohet se personi që ka shtënë ka qenë i dehur”, ka thënë Hoxha për Express, të shtunën.
Si pasoje e panikut të shkaktuar edhe disa persona tjerë gjithashtu kanë kerkuar ndihmë në QKUK, për shqetsimet apo lëndimet nga turma.
Mbrëmë më 29.07.2016 rreth orës 22;55 është raportuar se në Sheshin ,,Zahir Pajaziti’’ në Prishtinë ka pasur të shtëna me armë . Policia ka reaguar menjëherë dhe masa operacionale janë realizuar për ta trajtuar incidentin. Ne vendin e ngjarjes janë gjetur edhe disa gezhoja.
Situata është vënë nën kontroll dhe njësitet relevante policore kanë kryer ekzaminimet e nevojshme, përderisa procedurat hetimore për te sqaruar te gjitha rrethanat e rastit janë në proces. Rasti është iniciuar si “shkaktim i rrezikut të përgjithshëm”.
Procedurat hetimore janë duke vazhduar/Gazeta Express/
