Partia Demokratike e Kosovës (PDK) me anë të një komunikate për media ka thënë se “Vetëvendosjen” do ta braktisin një pjesë e madhe e nëndegëve të saj. PDK-ja ka theksuar se deklaratat e LVV-së se nuk marrin pjesë në zgjedhjet e Drenasit për arsyen se nuk duan të përfitojnë politikisht nga një dënim i padrejtë gjyqësor, është fals, shkruan Gazeta Express.
“Arsyeja e mospjesëmarrjes së Lëvizjes Vetëvendosje në zgjedhjet e jashtëzakonshme në Drenas, kinse ata nuk duan të përfitojnë politikisht nga një dënim i padrejtë gjyqësor, si ai i rastit “Drenica 2”, është vetëm pretekst pa sens nga ana e kësaj Lëvizjeje, duke i marrë parasysh deklaratat e tyre karshi njerëzve që janë prekur nga ky dënim”, thuhet në komunikatë.
Më tej PDK ka theksuar: “Ata kanë deklaruar se në këtë kohë janë duke i forcuar strukturat e tyre organizative me njerëz të moshave dhe profesioneve të ndryshme, por në fakt është krejt e kundërta. Pikërisht mungesa e kuadrove, strukturës dhe fuqisë politike në këtë Lëvizje është edhe arsyeja kryesore e refuzimit të pjesëmarrjes në zgjedhjet e jashtëzakonshme”.
