Komuna e Kamenicës sot ka filluar fazën e dytë të reformës në arsim në shkollën “Rexhep Mala” në Topanicë dhe në shkollën “Abdullah Krashnica” në Koretin.
Ndryshe prej vendeve tjera të Kosovës, në shkollat e Kamenicës nuk ka filluar mësimi. Krejt kjo për shkak të reformave në arsim.
Derisa mësimdhënësit kanë shkuar nëpër vendet e punës, ashtu si iu është caktuar nga komuna, një gjë të tillë nuk e kanë bërë nxënësit.
Këtë e ka thënë për Agjencinë e Lajmeve FaktePlus, kryetari i Komunës së Kamenicës, Qëndron Kastrati.
“Ne kemi filluar fazën e dytë të reformës. Për sot, informatat që kemi deri më tash nxënësi nuk kanë shkuar ne vendet ku iu kemi caktuar ne, ndërsa mësimdhënësit po. Gjithë mësimdhënësit e kanë respektuar vendimin e reformës dhe kanë shkuar ashtu si i kemi caktuar ne, tash shumë shpejt flasim dhe me të tjerët”, tha Kastrati.
Kastrati ka thënë për FaktePlus, se do të marrin të gjitha masat që të respektohen reformat në arsim dhe se nuk do të tërhiqet nga ky vendim. Këtu ai përdor thënien e popullit “Nuk jemi tu dashtë me i kësaj pune me stupcë”.
Kastrati thekson se masa do të ketë për secilin që ia mohon shkollimin fëmijës, duke mos i përjashtuar as prindërit.
“Të gjithë ata që nuk e respektojnë, ne jemi të detyruar me i ndërmarr masat. Jam i bindur që edhe prindërit do të bindën që t’i dërgojnë fëmijët në shkolla dhe do të bëjë gjithçka dhe nuk do të tërhiqem mbrapa. Ne nuk jemi tu dashtë me i hi kësaj pune me stupcë në krah qysh thotë populli. Ato janë të paraparë ligjërisht, parashihet qysh kush ndëshkohet nëse ia mohon një fëmije shkollimin qoftë edhe fëmiut”, tha Kastrati për FaktePlus.
Nga kjo reformë, Kastrati thotë se nuk do të mbetët asnjë mësimdhënës pa punë dhe se sipas tij të gjithë do të risistemohen.
“As një mësimdhënës nuk është përjashtuar, nuk ka mbet asnjë pa u angazhuar. Ne të gjithë mësimdhënësit i kemi risistemuar. Komuna është punëdhënësi dhe e cakton se për çka ka nevojë për një punëtorë. Po kujdesemi që mësimdhënësit më të mirë që e njohin teknologjinë, e njohin kurrikulën me qenë mësimdhënës drejtpërdrejtë me nxënës dhe gjithë të tjerët me u ri-sistemu, si bibliotekist, orë jo formale dhe gjithë tjerat”, tha ai.
Ndërsa, pesë mësimdhënës janë vendosur në biblioteka. Tre në njërën bibliotekë dhe dy në tjetër bibliotekë të fshatrave të kësaj komune.
“Në njërën bibliotekë janë vendosur tre mësimdhënës ndërsa në njërën dy dhe mendoj që kjo nëse i ke mundësitë kjo është shumë e nevojshme dhe shumë e rëndësishme që ne me i fuqizu sa më shumë bibliotekat dhe me u mundu me nxit sa më shumë leximin”, tregon ai.
Kastrati ka mohuar që është mbyllur shkolla në fshatin Bosavatë. Megjtihatë mësimdhënësit e këtij fshati e kishin kundërshtuar vendimin për reforma, por të gjithë ishin larguar nga lista e pagave.
E pas kësaj, ata ishin “detyruar” që ta pranojnë këtë reformë, kështu ka thënë Kastrati.
“Në momentin që ne i kemi larguar ata mësimdhënës që nuk e kanë respektuar vendimin tonë, i kemi larguar prej listës së pagave dhe ata të gjithë kanë ardh në komunë dhe janë paraqit të gatshëm me respektu vendimin e komunës”, shpjegon kryetari Kastrati.
Reformat në arsim në Kamenicë që nisën në shtatorin e këtij viti e që u kundërshtuan nga mësimdhënësit por edhe nga prindërit u përkrahën nga Sindikata e Bashkuara e Arsimit, Shkencës dhe Kulturës (SBAShK).
Kryetari i SBAShK, Rrahman Jasharaj për FaktePlus ka ripërsëritur se nuk është e udhës që fëmiojët me u bartë nga një fshat në tjetrin.
“Ne kemi dalë në teren dhe kemi qenë kundër sepse kemi thënë se nuk është në rregull që fëmijët të bartën në fshatra tjerë me kilometra të udhëtojnë drejt Kamenciës apo ndonjë vendi tjetër. Por po them se kemi mbetur të vetëm, të tjerët nuk kanë bërë asnjë hap”, tha Jasharaj për FaktePlus.
Jasharaj ka theksuar se mësimdhënësit e asaj ane nuk do të mbetën pa punë.
“Të parët e kemi ngritur zërin dhe kemi menduar se do të marrim mbështetje, por në vend të kësaj ne kemi marrë kritika se po përzihemi në kompetenca të huaja. Për ne lufta është që mësimdhënësit e Kamenicës të mos mbetën pa vend pune dhe pa pagë. Ndërsa për çështje tjera është MASHT-i i cili duhet të reagoj”, tha ai.
Nga shtatori i 2019-tës, nxënësit e Komunës së Kamenicës nuk do kanë ndarë më klasën vetëm me mësuesin, apo me dy-tre shokë të tjerë. Me reformën të cilën është duke e ndërmarrë Komuna e Kamenicës, klasët e shkollave fillore do të kenë mesatarisht 20 nxënës.
Riorganizimi i shkollave është hulumtuar dhe studiuar dhe konkludimin e gjeni në videon e mëposhtme. Nxënësit do të sistemohen nëpër shkolla përmes transportit të organizuar dhe siguruar nga Komuna. Cikli i ultë (klasët 0-5) do të jetë i ndarë nga cikli i lartë (klasët 6-9) në objekte shkollore të veçanta. /FaktePlus/.
