Këtë të diele, kryeministri i vendit, Isa Mustafa, përmes një statusi në facebook, ka dhënë një mesazh në prag të një tensionimi të ri të situatës politike në vend, ashtu siç parashohin shumë nga analistët politikë.
Kryeministri ka lavdëruar qeverisjen e tij dhe fuqinë që ka treguar koalicioni PDK-LDK në udhëheqje të institucioneve qendrore, duke përmendur sfidat nëpër të cilat edhe pritet të përballen. Për çështjen e demarkacionit, asociacionit dhe FSK-së, kryeministri Mustafa ka lënë të kuptohet se vendimet janë marrë dhe se këto pika do të kalojnë.
“Reformat zakonisht nuk janë populliste. Ato japin rezultate më vonë. Ne nuk do të dorëzohemi para reformave dhe vendimeve të mëdha, sado të vështira të jenë ato”, ka shkruar kryeministri, duke nënkuptuar se kërcënimet e fundit të opozitës nuk do t’i zmbrapsin ata nga vendimet e mëdha.
Ky është statusi i plotë i Mustafës në facebook:
Të nderuar qytetarë Kjo Qeveri dhe ky koalicion ka arritur shumë në kushte jo të zakonshme. E mundëm dhunën dhe përpjekjet për instalim të rrënimit të pushtetit demokratik me dhunë, të paparë jo vetëm në Ballkan por edhe në demokracitë tjera. Forcuam marrëdhëniet me BE-në; nënshkruam marrëveshjen e parë kontraktuale dhe plotësuam kriteret për liberalizim të vizave, shumë më shumë se sa vendet e tjera. Treguam se dimë ta zhvillojmë ekonominë; arritëm stabilitet të plotë buxhetor dhe stabilitet makroekonomik, me rritje të vazhdueshme reale ekonomike dhe ulje të normës së papunësisë. Treguam se ne i dalim zot vendit tonë në të gjitha pjesët e tij, pa marrë parasysh provokimet. Forcuam shtetin ligjor, luftuam korrupsionin, ekstremizmin dhe terrorizmin. Shprehëm gatishmërinë e përhershme që me opozitën të gjejmë zgjidhje për çështjet me interes nacional të vendit. Kemi sfida, jo të pakapërcyeshme, të transformimit të FSK-së, të demarkacionit të kufirit me Malin e Zi, të themelimit të Asociacionit të komunave me shumicë serbe. Dy nga këto sfida ndërlidhen me integrimin e serbeve në institucione, kurse demarkacioni i kufirit është çështje e përgjegjësisë së shumicës, tani kur gjërat janë sqaruar përfundimisht. Është kjo Qeveri e vendimeve të mëdha dhe e reformave të mëdha. Reformat zakonisht nuk janë populliste. Ato japin rezultate më vonë. Ne nuk do të dorëzohemi para reformave dhe vendimeve të mëdha, sado të vështira të jenë ato. Ndërmjet interesave afatshkurtra që ndërlidhen me votat dhe interesave të shtetit unë do të zgjedh këtë të dytën. IM
