Me ftesë të kryetarit të Grupit të Miqësisë me Kosovën të Kuvendit Kombëtar të Sllovenisë, Franc Trçka, një delegacion i Kuvendit të Republikës së Kosovës, i kryesuar nga Elmi Reçica, kryetar i Grupit të Miqësisë të Kuvendit të Kosovës me Parlamentin slloven, ka udhëtuar sot për një vizitë zyrtare në Slloveni.
Në një njoftim për media thuhet se gjatë kësaj vizite, Grupi i Miqësisë Kosovë – Slloveni i Kuvendit të Republikës së Kosovës, do të pritet në takim të veçantë nga kryetari i Kuvendit Kombëtar të Sllovenisë, Milan Berglez.
“Delegacioni parlamentar i Kosovës, në përbërje: Elmi Reçica, Slobodan Petroviç, Shpejtim Bulliqi, Xhevahire Izmaku, Albulena Haxhiu dhe Enver Hoti, po ashtu, do të zhvillojë takime me Grupin e Miqësisë Slloveni – Kosovë të Kuvendit slloven, si dhe me zyrtarë të lartë të Sllovenisë, në Kuvendin e saj dhe në Ministrinë e Punëve të Jashtme. Delegacioni do të qëndrojë në Republikën e Sllovenisë deri më 13 tetor 2016”, thuhet në njoftim./KosovaPress/
