Kryetari i Aleancës për Ardhmërinë e Kosovës (AAK), Ramush Haradinaj dhe ai i Partisë Social Demokrate, Shpend Ahmeti edhe zyrtarisht kanë nënshkruar marrëveshjen për koalicion parazgjedhor.
Pasi kanë marrë bekimin e Këshilleve Drejtuese të partive, Haradinaj dhe Ahmeti edhe kanë nënshkruar koalicionin parazgjedhor.
Kreu i PSD-së, Shpend Ahmeti tha se arritja e koalicionit është është një bashkëpunim i nisur kohë më parë si në aspektin politik e praktik.
“Ka pas spekulime se PSD po hyn në qeveri dhe po zëvendëson AAK, por ne kemi thënë qysh në fillim se kjo nuk është e vërtetë. Dhe tani po bashkohemi me AAK-në që me një program të përbashkët t’i fitojmë zgjedhjet. Ne luftojmë për pagë minimale, për të drejtat e punëtorëve dhe fusha tjera. Falënderoj AAK-në për këtë negocim të suksesshëm. Me këtë po i largojmë spekulimet për versione tjera”, ka thënë Ahmeti.
Listën e përbashkët të AAK-së dhe PSD-së do të kryesoj Ramush Haradinaj, i cili do të jetë edhe kandidat për kryeministër.
Ahmeti tha se do të vazhdojnë të kontaktojnë edhe me subjekte tjera në mënyrë që të zgjerohet koalicioni fitues.
Kurse lideri i AAK-së, Ramush Haradinaj ka kujtuar faktin se PSD është treguar konstruktive dhe në kohën kur është larguar Lista Serbe, ka qenë PSD që ka shtyrë proceset përpara, siç është rasti me krijimin e Ushtrisë së Kosovës.
“Jemi në diskutime edhe me Nismën e AKR-më. Nuk synojmë një PAN të ri, por mund të bashkëpunojmë me këto subjekte politike. Ne po krijojmë koalicionin e fitores”, është shprehur Haradinaj./FaktePlus
