Kryeministri i Kosovës, Isa Mustafa ka bërë të ditur për publikun se tema kryesore e bisedimeve me Zv.Presidentin Amerikan Joe Biden ka qenë luftimi i korrupsionit. Kryeministri shpreh se ka siguruar Biden se është luftuar krimi i organizuar dhe korrpusioni në Kosovë duke shtuar më tej se në Kosovë është siguruar edhe pavarësia e plotë e institucioneve të drejtësisë.
“Lufta kundër krimit të organizuar dhe korrupsionit ishte njëra nga temat që zuri vend të rëndësishëm në taimin që dje kisha me Zëvendëspresidentin e SHBA-ve, Joe Biden. E njoftova mikun e Kosovës se gjatë këtij mandati kemi ndërmarrë masa të suspsendimit nga puna të të gjithë zyrtarëve qeveritarë si dhe lirimin nga pozitat më të larta të të gjithë atyre që janë akuzuar për dyshime për vepra penale në mandatet e kaluara.” shkruan Mustafa.
Postimi i plotë i Kryeministrit Isa Mustafa:
Shtetet e Bashkuara të Amerikës janë përkrahës të parezervë të Republikës së Kosovës, por është shumë e qartë se Kosova duhet të përmbushë obligimet e saj në raport me ratifikimin e demarkacionit si dhe lidhur me marrëveshjet e dialogut në Bruksel. Përkrahja e SHBA-ve do të jetë edhe më e fuqishme kur Kosova tregohet partner serioz në përmbushjen e obligimeve të saja ndërkombëtare.
Lufta kundër krimit të organizuar dhe korrupsionit ishte njëra nga temat që zuri vend të rëndësishëm në taimin që dje kisha me Zëvendëspresidentin e SHBA-ve, Joe Biden. E njoftova mikun e Kosovës se gjatë këtij mandati kemi ndërmarrë masa të suspsendimit nga puna të të gjithë zyrtarëve qeveritarë si dhe lirimin nga pozitat më të larta të të gjithë atyre që janë akuzuar për dyshime për vepra penale në mandatet e kaluara. Janë ndërmarrë masa edhe ndaj zyrtarëve të agjensioneve të pavarura, të tërheqjes vullnetare apo të largimit nga detyra. Ndërkaq është siguruar pavarësi e plotë ligjore dhe kushtetuese e institucioneve të drejtësisë, prokurorisë dhe gjyqësisë, infrastrukturë fizike e volitshme për punë dhe buxhet me prioritet, në krahasim me fushat tjera. U vlerësua se lufta kundër krimit të organizuar dhe korrupsionit është ndër parakushtet themelore për zhvillim të qëndrueshëm ekonomik dhe demokratik të vendit tonë.
Pasdite, afër kampit ushtarak Bondsteel, kamp i cili është simbol i garantit të mbrojtjes dhe të sigurisë në Kosovë dhe me gjerë, morëm pjesë në ceremoninë e emërtimit të rrugës Ferizaj-Gjilan me emrin Joseph R. “Beau” Biden, III, djalit të Zëvendës Presidentit të SHBA-ve, Joe Biden. Po ashtu, aty ka marrë vend të përhershëm edhe monumenti në përkujtim të kontributit të Joseph R. “Beau” Biden, III për Kosovën. Rruga, emërimin e të cilës e promovuam, do ta kthejë shpesh vëmendjen e familjes Biden kah Kosova. Tradita jonë e bënë shtëpinë e kosovarit edhe shtëpi të mikut të tij. Prandaj, familja Biden janë miq të Kosovës.
Zoti e bekoftë miqësinë tonë të përhershme,
Zoti e bekoftë familjen Biden,
Zoti e bekoftë popullin amerikan dhe Shtetet e Bashkuara të Amerikës,
Zoti e bekoftë Kosovën dhe popullin e saj.
