Natën e kaluar policia ka regjistruar disa parregullsi lidhur me procesin zgjedhor në Maqedoni.
Në Strumicë është zbuluar një veturë në bagazhin e së cilës është gjetur një kopje e listës së zgjedhësve dhe një fletore me emra dhe numra të amzës të personave nga nacionaliteti rom, ndërsa në Novo Sellë të Strumicës, një banorë ka denoncuar se dy persona kanë ardhur në shtëpinë e tij dhe i janë kërcënuar se do t’ia heqin ndihmën sociale dhe do ta vrasin nëse nuk ua jep letërnjoftimin.
Në Shtip dy persona kanë tentuar të vjedhin material zgjedhor, por janë vërejtur nga policia e cila e ka siguruar materialin, pas çka dy personat kanë ikur.
Në Demir Hisar është shënuar rast ku dy persona e kanë thyer heshtjen parazgjedhore, ndërsa kanë ofruar edhe para për të votuar një parti të caktuar. Parregullsi janë vërejtur edhe në Koçanë, ku ndaj dy personave janë ngritur padi penale për tentim të blerjes së votave për njërën nga partitë, dhe përpjekje për marrjen e letërnjoftimeve në mënyrë që persona të caktuar të mos kenë mundësi të votojnë.
