Ministri i Kulturës, Rinisë dhe Sporteve, Kujtim Shala ka ngushëlluar familjen Demolli, me rastin e ndarjes nga jeta të shkrimtarit Arif Demolli.
Ngushëllimi i ministrit Shala:
E nderuara familje Demolli,
Me dhimbje dhe pikëllim të madh e mora lajmin për ndarjen nga jeta e të dashurit tuaj, shkrimtarit tonë të mirënjohur, Arif Demollit.
Ndarja nga kjo jetë e shkrimtarit Demolli, është një humbje e madhe për familjen, miqtë e tij dhe për letërsinë e kulturën shqiptare.
Arif Demolli, me krijimtarinë e tij, ka dhënë shumë për artin letrar, duke punuar me devocion dhe duke kontribuuar në pasurimin e jetës intelektuale, arsimore e edukative për breza të tërë në Kosovë.
Kujtimi për shkrimtarin Arif Demolli do të jetë i përhershëm për ne, si një shembull i urtësisë dhe zellit për rritjen e vlerave në krijimtarinë letrare shqipe.
E nderuar familje Demolli, miq të Arifit, dashamirë të tij, pranoni ngushëllimet e mia më të sinqerta për humbjen tuaj të madhe.
