Kompania e miellit “M&Sillosi;” sot ka nënshkruar marrëveshje bashkëpunimi me kompaninë Kentucky Fried Chicken (KFC), për furnizim me miell për gjithë rrjetin zingjiror të KFC-së në Kosovë dhe botë.
Përfaqësuesi i kompanisë “M&Sillosi”, Sead Shehu këtë bashkëpunim me rrjetin KFC e konsideron si dëshmi të re që produktet e Kosovës mund të arrijnë standarde për t’u eksportuar.
Ai tha se për kompanin “M&Sillosi” është kënaqësi që pas shumë përpjekjeve kanë arritur të jenë pjesë e kuzhinave të KFC-së.
“Kemi arritur pas shumë përpjekjeve ta zhvillojmë produktin e ri, i cili i plotëson të gjitha standardet e nevojshme dhe jemi shumë të lumtur dhe falënderues që kemi arritur me qenë pjesë e furnizimit të gjithë rrjetit ndërkombëtar, të rrjetit tonë miellit në të gjitha restorantet e KFC-së në botë. Është kënaqësi dhe kjo është një dëshmi e re një dëshmi e cila tregon se produktet e Kosovës mund të arrijnë standarte dhe të eksportohen në vende të ndryshme të botës”, tha ai.
Ndërsa, përfaqësuesi i kompanisë, Kentucky Fries Chicken, Fatmir Zymberi tha se është i lumtur që edhe një produkt i Kosovës u certifikua me standarde të larta të sigurisë ushqimore.
Ai po ashtu tha se deri tani restorantet e KFC-së janë furnizuar me miell nga Polonia, ndërsa nga sot të gjitha lokalet e tyre në botë do të furnizohen me miellin “M&Sillos”.
“Deri sot ne këtë miell e kemi marrë nga Polonia dhe nga sot ky miell përdoret në restorantet tona por edhe në çdo vend të botës, do të thotë është hapur dera e këtij produkti që të shitet në të katër anët e botës dhe i lutem zotit të kemi një bashkëpunim afatgjatë dhe sa më shumë produkte tjera të futen dhe të certifikohet në famë ndërkombëtare”, tha ai.
Ndryshe, mielli “M’Sillos” është një prodhim i veçantë i cili prodhohet enkas vetëm për nevojat e KFC-së. KFC e themeluar nga Colonel Harland Sanders, KFC është ndër rrjetet më të mëdha në botë të restoranteve të ushqimit të shpejtë në botë e cila është prezent në 123 vende me 20 mijë lokacione, dhe që nga viti 2016 edhe Kosova është bërë pjesë e këtij rrjeti ushqimor.
Ndërsa, “M&Sillosi” është fabrika më e madhe e miellit në regjion e cila brenda ditës prodhon 600 tonë, dhe është e certifikuar nga institucionet me të larta ndërkombëtare për auditimin e produkteve ushqimore FSSC 22000, BRC, IFS, dhe FBA. /KP/
