Një nga takimet më të rëndësishme të Ministres së Integrimit Dhurata Hoxha, në Parlamentin Evropian në Strasburg, ishte takimi me David McAllister, euro deputet, Kryesues i Komisionit për Punë të Jashtme, AFET, për marrëdhëniet me Asamblenë Parlamentare të NATO-s, për Sigurinë dhe Mbrojtjen, etj, bën të ditur Ministria e Integrimeve përmes një komunikate për media.
Ministrja Hoxha, vuri në dukje zhvillimet aktuale në vend dhe rajon, si dhe të arriturat, sfidat dhe prioritetet qeveritare si procesi integrues, zbatimi i MSA-së, zhvillimi ekonomik dhe bashkëpunimi rajonal.
Hoxha po ashtu diskutoi me euro deputetin për procesin e dialogut dhe normalizimit të marrëdhënieve me Serbinë si pjesë e agjendës euro integruese.
“Kosova është e përkushtuar që të përmbushë të gjitha obligimet që dalin nga MSA-ja por edhe obligimet tjera që garantojnë përshpejtimin e procesit integrues por edhe përfshirjen në planet e zgjerimit”, theksoi Hoxha.
McAllister theksoi se Kosova është pjesë e përspektivës evropiane të Ballkanit Perëndimor dhe kërkoi nga Ministrja Hoxha që Kosova të fokusohet dhe të punojë me shumë në përmbushjen e obligimeve të saj në dy fusha kryesore, sundimin e ligjit dhe dialogun me Serbinë si dhe çështjet tjera që kërkohen nga BE-ja, në mënyrë që Kosova të tregoj përkushtimin dhe seriozitetin e saj karshi perspektivës evropiane.
Me këtë rast, euro deputeti McAllister, që i përket grupit të Partive Popullore në Parlamentin Evropian, i cili vije nga Berlini, i ofroi Ministres Hoxha përkrahje në procesin integrues të Kosovës, duke kërkuar më shumë angazhim nga institucionet e Kosovës. /KosovaPress/
