Kina i ka raportuar 40 raste të reja të koronavirusit, nëntë më pak se një ditë më parë. Këto shifra i publikoi Komisioni Kombëtar i Shëndetësisë.
Njëzet e shtatë raste u shënuan në kryeqytetin Pekin, ku një ditë më parë ishin regjistruar 36 të infektuar. Qyteti i madh është duke u përballur me valë të re të përhapjes që besohet ta ketë burimin nga një dyqan lokal.
Numri i rasteve të ardhura nga vendet e huaja gjatë 24 orëve të kaluara është tetë, ndërsa një ditë më parë ishin shënuar dhjetë raste të tilla. Gjatë kësaj periudhe u shënuan edhe gjashtë raste pa simptoma, 12 më pak se një ditë më parë.
Kina nuk i llogarit në shifrën zyrtare të infektimeve personat që kanë koronavirus por që nuk shfaqin simptoma, shkruan “Reuters”, transmeton Gazeta Express.
Në këtë shtet u regjistruan rastet e para të koronavirusit në botë dhjetorin e vitit të kaluar. Më vonë, virusi i ri u përhap në tërë botën me mbi 8 milionë njerëz të infektuar.
