Forma dhe përmbajtja e dialogut Kosovë -Serbi qe pesë vjet nuk i ka sjellë asnjë avancim vendit në proceset integruese drejt BE-së. Kosova nuk ka mundur të anëtarësohet në organizatat kryesore ndërkombëtare, përveç atyre sportive. E për shkak të këtyre bisedimeve është ndalur edhe kërkimi i përgjegjësive ligjore për dëmet e shkaktuara gjatë luftës së fundit në Kosovë. Këto janë disa nga konstatimet e deputetes së Lëvizjes “Vetëvendosje”, Donika Kadaj-Bujupi, e cila ka listuar disa probleme e të cilat sipas saj i janë shkaktuar vendit pikërisht nga ky dialog.
“Republika e Kosovës nuk ka asnjë avancim drejt procesit të integrimit në BE, i cili buron nga rezultatet e negociatave Kosovë – Serbi për 5 vjet. Republika e Kosovës nuk ka mundur të anëtarësohet në organizatat kryesore ndërkombëtare (përjashto fushën e sporteve) falë luftës së ashpër diplomatike nga Qeveria e Serbisë”, ka thënë Kadaj Bujupi, për Gazetën Monitor.
Sipas Kadaj-Bujupit qytetarët e Kosovës vetëm kanë pësuar nga ky dialog pasi që problemet e brendshme kanë mbetur nën hije, me pretekstin e qeveritarëve, pjesëmarrja në procesin e negociatave.
Çështja e krimeve të luftës, sipas deputetes Kadaj-Bujupi, kanë mbetur po ashtu të pazgjidhura nga ky proces.
“Për shkak të këtij procesi negociatash është ndalur (përveç kërkesave nga brenda Kosovës) kërkimi i përgjegjësisë ligjore e politike për – 1. Personat e dhunuar gjatë luftës (asnjë i dënuar, asnjë proces gjyqësor, në Kosovë, Serbi, ndërkombëtar) 2. Hetimet mbi masakrat e organizuara nga ushtria dhe forcat policore të Sllobodan Millosheviqit, 3. Kthimi i fondi pensional”, ka thënë Kadaj-Bujupi.
Qeveritë e Kosovës kanë bërë shumë koncesione gjatë këtij procesi, vlerëson Kadaj-Bujupi dhe se bilanci përfundimtar sa i përket tash Kodit Telefonik, sipas saj, është “se Republika e Kosovës bëhet pjesë e Serbisë në fushën e telekomunikacionit”.
Kadaj-Bujupi ka folur edhe për murin të vendosur mbi urën e lumit Ibër e që sipas saj ky është agresion i drejtpërdrejtë i Serbisë në Kosovë.
“Muri është agresion i drejtpërdrejtë i Serbisë ne Kosove përmes barrikadës tani te shndërruar me mur. Pra shume vite negociata për te liruar urën tani ne vend te urës kemi murin I cili konfirmon qe Serbia zyrtare vazhdon te udhëhiqet nga mentaliteti fashist I viteve te 90 ndërkohë qe qeveria e Kosovës tregohet servile dhe e pafuqishme karshi këtyre veprimeve”, ka theksuar Kadaj-Bujupi.
