Kryeministri finlandez, centristi Juha Sipila njoftoi sot se dëshiron të paraqes dorëheqjen e qeverisë së tij presidentit sepse kërkonte të ndahej nga partneri i tij i koalicionit, ”Finlandezët e vërtetë” (euroskeptike), që zgjodhi si kryetar të saj një deputet të dënuar për deklarata raciste.
“Pasi kam dëgjuar mendimin e grupit parlamentar (…) do të shkoj te presidenti dhe do t’i paraqes dorëheqjen e qeverisë”, deklaroi në një konferencë shtypi Sipila.
Kreu i qeverisë do të bisedojë fillimisht me partinë e tij dhe do të lejojë ministrin e tij të Financave, Petteri Orpo të konsultohet me partinë konservatore, që kërkon të ruajë partneritetin e koalicionit.
”Finlandezët e vërtetë” zgjodhën në krye Jussi Halla-aho, 46 vjeç, i cili shpreson të rrisë popullaritetin, me një linjë radikale antimigracion dhe antievropiane, një formacion që ka pasur rënie të ndjeshme në sondazhe që prej kohës që është në pushtet.
