Lideri i Lëvizjes Vetëvendosje, Albin Kurti e ka përkujtuar sot në 552 vjetorin e vdekjes, heroin kombëtar, Gjergj Kastriotin – Skënderbeun.
Si kandidat për kryeministër Kurti ka shkruar për trimërinë e pashoq dhe aftësinë e lartë ushtarake të Skënderbeut, i cili duke u përballur pareshtur me armiqtë, e ka krijuar de-facto një shtet të pavarur arbëror.
Edhe pse dallimi i mesjetës me kohën tonë siç thotë Kurti është aq i madh, sa që çdo krahasim politik do të ishte një përkthim i paqëndrueshëm, sipas tij, janë disa nga vlerat njerëzore e politike që mund të përdoren për frymëzim edhe sot.
Por, është interesante se çfarë ka zgjedhur Kurti të merr prej tipareve të vyeshme të Skënderbeut.
Ai në këtë rast duket se i ka dhënë një porosi drejtuesve të LDK-së, pasi ka thënë se koha kurrë nuk kthehet pas.
“Fjalia e Skënderbeut duhet të jetë thënë vërtet, po të shohësh se ai e ndoqi parimin e bashkimit edhe me Besëlidhjen e Lezhës, ku u përpoq të mblidhte sa më shumë prijës arbër, minoritarë e disa aleatë fqinj, për ta bërë rezistencën. Po t’i kishte mbledhur të gjithë, po të kishin bashkëpunuar me disiplinë, mbase do të ishte themeluar një shtet edhe më jetëgjatë. Por, historia nuk bëhet me nëse, e koha nuk kthehet kurrë pas…”, ka shkruar Kurti në rrjetin social.
Ky është statusi i Kurtit për këtë përvjetor:
Para 552 vitesh, sipas konsensusit të gjerë të historianëve, vdiq në moshën 62-vjeçare heroi ynë kombëtar, Gjergj Kastrioti Skënderbeu. Ai jetoi e luftoi në kohë të tjera, në mesjetën e principatave të vogla e perandorive të mëdha feudale. Dallimi i mesjetës me kohën tonë është aq i madh, sa që çdo krahasim politik do të ishte një përkthim i paqëndrueshëm. Por, megjithatë disa nga vlerat njerëzore e politike mund të përdoren për frymëzim edhe sot. Trimëria e tij e pashoq, aftësia e lartë ushtarake e pranuar edhe nga armiqtë, gatishmëria për t’u përballur me ushtri shumë më të forta, për të mbrojtur pavarësinë e tokës së tij, duke krijuar de-facto një shtet të pavarur arbëror.
Por unë sot dua të marr një tjetër prej tipareve të vyeshme të Skënderbeut tonë: bashkimin për liri. Historianët na tregojnë për fjalinë e famshme me të cilin ai përshëndeti popullin pas rikthimit si fitimtar në Krujë: Lirinë nuk ua solla unë, por atë e gjeta këtu midis jush. Kjo fjali edhe sot tingëllon progresiste. Individualizmi bazohet te liria, por liria mbërrihet vetëm prej angazhimit kolektiv, ajo banon te bashkësia. Individi duhet të bashkëpunojë, që të ecë përpara si individ. Fjalia e Skënderbeut duhet të jetë thënë vërtet, po të shohësh se ai e ndoqi parimin e bashkimit edhe me Besëlidhjen e Lezhës, ku u përpoq të mblidhte sa më shumë prijës arbër, minoritarë e disa aleatë fqinj, për ta bërë rezistencën. Po t’i kishte mbledhur të gjithë, po të kishin bashkëpunuar me disiplinë, mbase do të ishte themeluar një shtet edhe më jetëgjatë. Por, historia nuk bëhet me nëse, e koha nuk kthehet kurrë pas…
