Kosova dhe kosovarët janë gjetur ndërmjet dy taborëve sa i përket zhvillimeve të fundit në Turqi. Një pjesë janë kundër presidentit turk Erdogan, të cilin bazuar në veprimet e viteve të fundit, e cilësojnë si një person që ka nisur të marrë rrugën e diktatorit.
Por në anën tjetër, ka shumë shqiptarë që e mbështesin atë duke e konsideruar edhe si shpëtimtar të shqiptarëve, ndonëse nuk ka asnjë të dhënë se çfarë ka bërë për ta, raporton lajmi.net.
Sidoqoftë, mbështetja më e madhe duket se Erdoganit i shkon nga klerikët fetarë islam në Kosovë, si në rastin e imamit Fatmir Latifaj.
Madje për të kanë filluar të shkruhen edhe poezi e që recitohen nga imamët gjatë predikimeve të tyre fetare në xhami, raporton lajmi.net.
Imami në xhaminë e Shipolit në Mitrovicë, sipas përshkrimit që i ka bërë vetës në llogarinë e tij në facebook, shquhet për hytbet e tij emocionues. “Dhe jo rrallë i bëjnë të rrjedhin lotët të pranishmëve”, shkruan Latifaj.
Hoxha i cili shihet në këtë video, e për të cilin shkruan se është veteran i UÇK-së që në luftë e humbi edhe pjesën e trupit te tij (dorën), reciton para xhematit një poezi, sipas tij, të shkruar nga një koleg i tij, raporton lajmi.net.
Imami nuk e përmend se kush është kolegu i tij që e ka shkruar këtë poezi amatore, por më shumë se kaq, brengosëse është se si klerikët fetarë harrojnë se për çfarë dalin para xhematit.
Në vend të fjalëve të Zotit ata merren me interpretime vjershash për politikanët, në këtë rast atë turk. Video është publikuar me 24 korrik 2016./lajmi.net
Poezia që hoxha e lexon titullohet “Poezi për vëllanë trim”, e cila me ‘vëlla’ i referohet presidentit turk, Erdogan. Lajmi.net e sjell të transkriptuar ashtu siç e ka lexuar hoxha.
Erdogan mik i shqiptarëve
Të shpëtoi Zoti prej qufarëve
Ty Allahu t’ka ndihmu,
Tanë puçistat m’i rrethu
Besën e Allahut ti e ke dhanë
Kurrë vatanin mos me e lan
Krejt bota n’’kamë janë çu
Bashkë me FETO me t’tradhtu
Por atyre mendja s’iu shkoi
Se me ty s’është lojë
Gjeneralët n’kamë janë çu
Me ushtri me t’zaptu
Por një gjë nuk e kanë ditë
Se miletin e kanë pritë
Gra e burra hov kanë marrë
Erdoganin vet mos me lan
N’Aeroport populli ka dalë
Se Erdogani k’shtu ju ka thanë
Se vatanin duhet me mbrojë
Nga puçistat djallëzor
Moj Turqi moj perlë e artë
Në sy t’armikut vend i zjarrtë
T’sulojnë duke t’hkundë,
Por ti qëndron e pa lëkundë.
