Regjimi i presidentit sirian Bashar al-Assad ka vrarë gazetaren amerikane Marie Colvin dhe kolegët e saj në Homs të Sirisë në 2012.
Ky është përfundimi i arritur pas një hetimi katër vjeçar të Reporterëve pa Kufi. Familja e gazetares amerikane kishte ngritur më herët një padi kundër Qeverisë siriane, të cilën e akuzon si vrasëse të Colvin.
Sekretari i Përgjithshëm i Organizatës Reporterët pa Kufij, Christophe Deloire, deklaron se pas hetimeve është zbuluar se gazetarja Marie Colvin është vrarë nga regjimi i Presidentit sirian Bashar al-Assad në 2012.
“Dokumentet dhe dëshmitë e mbledhura gjatë hetimit katër vjeçar, tregojnë qartësisht se regjimi i Assad ishte i informuar nga një femër, se Marie Colvin dhe gazetarë të tjerë ndodheshin në një apartament në Homs dhe gjithashtu kanë përgjuar telefonat e tyre. Pas kësaj është vendosur vrasja e Marie Colvin dhe e gazetarëve të tjerë , thotë Deloire për Reuters.
Colvin dhe fotoreporteri Remi Ochlik u vranë në qytetin sirian Homs në 2012 teksa po raportonin rreth konfliktit në Siri, një konflikt që zgjat prej 6 vitesh.
Colvin dhe Ochlik ishin dy prej reporterëve që kishin fituar çmime si pasojë e punës së kryer në Lindjen e Mesme, Azi dhe në zona të tjera të nxehta.
Colvin e cila kishte humbur një sy teksa punonte në Shri Lankë, në vitin 2001, raportonte për britaniken “Sunday Times” në kohën kur u nda nga jeta.
Deloire deklaroi se padia ligjore dhe procedurat e tjera do të jenë të dobishme për të luftuar krimin që prek gazetarët.
