Një ditë para zgjedhjeve parlamentare në Mal të Zi, Gëzim Hajdinaga, kryesues nga Lista që përfaqëson koalicionin “Me një qëllim”, të përbërë nga Partia Demokratike, Iniciativa Qytetare-Tuz, Lidhja Demokratike në Mal të Zi dhe Lëvizja Qytetare “Perspektiva”, ka folur për pritjet dhe rëndësinë që kanë këto zgjedhje dhe për bashkimin e forcave shqiptare atje.
Hajdinaga në një intervistë ekskluzive për emisionin ‘Alo Mirëmëngjesi’ të Radio Dukagjinit, ka folur edhe për qëndrimin e forcës së bashkuar shqiptare rreth Demarkacionit Kosovë-Mali i Zi, ndërsa që këto zgjedhje i ka vlerësuar si më të rëndësishmet pas referendumit për pavarësinë e Malit të Zi.
“Bashkimi i forcave në koalicionin tonë shqiptarë, gjithsesi është një hap para, edhe pse mos të harrojmë se shqiptarët këtu edhe kësaj here janë me tre lista (koalicione). Bashkimi është i rëndësishëm meqë këto zgjedhje janë edhe më të rëndësishmet dhe vendimtare për integrimet tona, do thoja janë më të rëndësishmet pas referendumit për pavarësinë e Malit të Zi”, tha Hajdinaga.
Gëzim Hajdinaga që ka qenë edhe ish ministër për të drejtat e pakicave në Qeverinë e Malit të Zi dhe ish-kryetar i Komunës së Ulqinit, e tash kryesues i Listës shqiptare me moton ‘Me një Qëllim’, është prononcuar edhe për çështjen e Demarkacionit Kosovë-Mali i Zi.
“Tek çështja e Deamarkacionit Mali i Zi – Kosovë, mendojmë se negociatat janë arma më e mirë e rishikimit të çdo pengese që mund të ketë në bisedimet ndërfqinjësore por edhe mes vete. Unë urojë që kjo të shkojë në të mirë të të dyja shteteve pa u prekur asnjë milimetër nga asnjëri shtet por duke u verifikuar e vërteta. Çështja të zgjidhet edhe pajtimin e popullatës andej dhe këndej kufirit.”-deklaroi Hajdinaga.
