Seanca gjyqësore për rastin “Puç” sot është anuluar përsëri në një kohë të pacaktuar, pasi që dy pjesëtarë të porotës nuk kanë pasur certifikata të sigurisë.
Në seancën e sotme në Gjykatën penale erdhën lideri i LSDM-së, Zoran Zaev i cili është i akuzuar në këtë rast dhe prokurorja speciale publike, Katica Janeva. Prokurorja speciale Janeva kërkoi të gjithë t’i tregojnë certifikatat e sigurisë dhe i bëri vërejtje gjykatëses se gjykimi është duke u anuluar pa nevojë gjatë tërë vitit. Avokati Filip Medarski, pyeti nëse në seancën e sotme është thirrë edhe kryetari i VMRO-DPMNE-së dhe ish-kryeministër Nikolla Gruevski i cili është dëshmitar.
Seanca për rastin “Puç” u caktua për sot pasi u anulua më16 shtator, pasi që këshilli gjyqësor nuk ishte i kompletuar, gjegjësisht njëri prej gjykatësve të porotës nuk ka mundur të marrë pjesë për shkaqe shëndetësore.
Lëndën “Puç” në të cilin si i akuzuar i katërt është lideri i LSDM-së, Zoran Zaev e hapi Prokuroria për përndjekjen e krimit të organizuar dhe korrupsionit, ndërsa më pas e ndërmori Prokuroria Publike Speciale, pasi që lidhet me përgjimin joligjor.
I akuzuari i parë është Zoran Verushevski, ndërsa akuzohen edhe bashkëshortja e tij Sonja Verushevska, Gjorgji Lazarevski i punësuar në MPB dhe Branko Palifrov, funksionar në komunën e Strumicës. Ata akuzohen për “spiunim” dhe “dhunë ndaj funksionarëve të shtetit”.
