Në një fshat në Kroaci, brenda një frigoriferi është gjetur trupi i një gruaje e cila ishte zhdukur më shumë se 18 vjet më parë.
Policia njofton se për këtë rast ka arrestuar motrën më të vjetër të Jasmina Dominiq, e cila u raportua e zhdukur në vitin 2005, por ishte parë për herë të fundit në vitin 2000, kur ishte 23 vjeç.
Trupi u gjet të shtunën në një frigorifer në korridorin e shtëpisë së familjes Dominiq në fshatin Pavloveq, në verilindje të Zagrebit, njoftoi policia përmes një deklarate për media.
Smiljana Srneq, 45 vjeçe, u arrestua ndërkaq po zhvillohet autopsia e trupit të motrës së saj, njofton Assocciated Press.
Zëdhënësi i policisë Nenad Risak tha se familja i kishte thënë policisë në të kaluarën se Dominiq jetonte jashtë vendit.
Rasti ka tronditur Kroacinë, dhe shumë njerëz pyesin se si ishte e mundur që familja të kishte jetuar kaq gjatë me një trup të fshehur në shtëpi.
“Ata (familja) na orientuan në drejtime të tjera gjatë hetimeve”, tha Risak.
Ai ka dhënë detaje për hetimin fillestar lidhur me zhdukjen e Jasmina Dominiq.
“Ne kontrolluam shtëpinë (gjatë hetimit) … por nuk kishim informacion se mund të kishte ndodhur diçka brenda shtëpisë.”
