Brenda pak dite, qytetarët e Drenasit pritet t’u drejtohen kutive të votimit për të zgjedhur kryetarin e ri të Komunës pas largimit të ish-kryetarit Nexhat Demaku, si shkas i konfirmimit të dënimit nga Gjykata e Apelit.
Zyrtarë në Komisionin Qendror të Zgjedhjeve thonë se janë të gatshëm t’i mbajnë këto zgjedhje, ndonëse ende nuk ka shpallje zyrtare të tyre nga presidenti.
“Komisioni Qendror i Zgjedhjeve tashmë ka bërë të njohur qëndrimin e tij se është i gatshëm për t’i organizuar këto zgjedhje. KQZ-ja është në pritje të shpalljes së datës së këtyre zgjedhjeve nga Presidenti i Republikës së Kosovës. Pas kësaj, KQZ-ja do të ndërmarrë të gjitha hapat e nevojshëm për organizimin e tyre”, thuhet në përgjigjet e KQZ-së dërguar Indeksonline.
Këto janë zgjedhje të jashtëzakonshme, prandaj sipas KQZ-së nuk janë të parashikuara në buxhetin e KQZ-së për vitin 2016.
“Me kohë do t’i drejtohemi Qeverisë së Kosovës për buxhet shtesë për organizimin e këtyre zgjedhjeve. Aktualisht jemi në fazën e planifikimit të buxhetit, por se sa do të kushtojnë këto zgjedhje mund ta dijmë me saktësi pas përfundimit të të gjithë procesit zgjedhor”, kanë thënë në KQZ.
