Me 70 për 2 kundër dhe dy abstenime Kuvendi miratoi Projektligjin për ndryshimin dhe plotësimin e Ligjit për Buxhetin e Republikës së Kosovës për vitin 2016.
Megjithëse filloi me dy orë vonesë, debati për këtë projektligj ishte i gjatë dhe i ashpër. Ndarja e mjeteve prej 300 mijë euro për specialistët e shëndetësisë dhe specializantëve, ka ngjallë debat mes deputeteve të Kuvendit të Kosovës. Naser Osmani, tha se kjo është një zgjidhje e përkohshme, për specialistët shëndetësor.
“ Është bërë ndarja e buxhetit prej 300 mijë euro, për pagesën e specialistëve të shëndetësisë. Kjo është një zgjidhje e përkohshme sa i përket pagesës së specialistëve. Ndërkaq komisioni i rekomandon ministrit të shëndetësisë, që ta hartojë listën e saktë të specialistëve që janë financuar nga buxheti i Kosovës, të cilët kanë specializuar dhe të cilët janë të papunë, të iu jap prioritet. Po ashtu kërkon të jap listën e saktë edhe të atyre që kanë specializuar dhe janë të pa sistemuar, por të cilët nuk kanë specializuar me mjetet e qeverisë”, tha ai
E në lidhje me këtë foli dhe Adem Grabovci, i cili tha se mjetet janë ndarë për specialistët por duhet të futen dhe specializantët, në mënyrë që t’u krijohet mundësia që ta ndjejnë veten të barabartë me të tjerët.
“Kërkojmë që në këtë kuadër të futen edhe specializantët edhe ata që janë në proces e sipër të krijohet mundësia që edhe ata të ndihen të barabartë me të tjerët”, tha ai.
E për këtë ka reaguar deputeti Gëzim Kelmendi, i cili tha se çështja e mjekëve specialistë, është politizuar, në mes të rivalëve të koalicionit PDK-LDK.
“ Ajo çka më bënë të marrë fjalën, është politizimi i kësaj çështje dhe padrejtësia përballë kuadrove tjera profesionale. Politizimi ditëve të fundit që kemi parë, mes rivalëve të koalicionit PDK-LDK në anën tjetër nga ministria, komisioni, tash na del dhe udhëheqësi i grupit parlamentar të PDK-së”, tha ai.
Ndërsa deputeti Glauk Konjufca ka reaguar për vonesën e fillimit të seancës, gjatë kohës sa po shqyrtohej shqyrtimi i dytë i Projektligjit për ndryshimin dhe plotësimin e Ligjit për Buxhetin e Republikës së Kosovës për vitin 2016,
“Kjo seancë filloi me dy orë vonesë. Na keni ftuar në orën 10 për me marrë pjesë në seancën e Kuvendit dhe seanca filloi në orën 12. Unë kuptoj kur njerëzit presin 10 apo 15 minuta. Ama kur njerëzit presin dy orë, kjo me të vërtetë pritja nuk ka kuptim. Meqë jemi në piken e buxhetit, unë e di saktësisht pse jeni vonu dy orë. Jeni vonu për shkak të kësaj pike për të cilën po e diskutojmë. Ju keni bërë deri para pak kohesh deri në ora 12 kur u kthym në seancë, me siguri negociatat e juaja kanë fillu herët në mëngjes me LDK-në, për me i kry Aksham Pazarin e këtij leximit të dytë të buxhetit. Kjo tregon se ju buxhetin as që e konceptoni si mjet publik, për të krijuar të mira për qytetarët. Ju këtë buxhet si forca të koalicionit qeverisës, si parti që e qeverisni baskë Kosovën. Ju më shumë e shihni këtë buxhet si njëfarë plaçke, për me nda në hisen e secilit. Ndryshe nuk ka kuptim me u vonu dy orë edhe me negocu për buxhetin. Kjo tregon se në çfarë gjendje është qeverisja dhe në çfarë mënyre konceptohet buxheti i republikës së Kosovës. Është e pafalshme që vini këtu e filloni udhëheqjen e seancës pa asnjë fjalë për këtë vonesë dy orëshe. A duhet dikush me dhënë përgjegjësi për këtë jo seriozitet..Kjo Republikë dhe ky shtet është bërë Pazar, krejt prej koalicioni PDK –LDK”, tha ai.
E Kadri Veseli duke iu përgjigjur Konjufcës për akuzat, tha se edhe ata e kanë pushtetin në Prishtinë dhe ta shikojnë se kënd po e vendosin.
“ Sa i përket kësaj çështje edhe ju e keni pushtetin shikoni kënd po e vendosni në Prishtinë. Sa i përket bordeve të pavarura, jemi besoj shumë shpejtë do ta kemi një kompani që ka me i përcaktu në mënyrë profesionale”, tha ai.
Ndërsa Ismet Beqiri tha se janë për keqardhje deklarata e Konjufcës.
“ Asnjë aksham Pazar e asnjë bisedë s’kam marrë pjesë as që është biseduar për buxhet. Se pse është vonu seanca kryetari sigurisht mundet me thanë sepse është kryetar dhe ai është vonu që i ka arsyet dhe i thotë. Por me përgjegjësi them se kjo s’ka të bëjë me buxhetin fare”, tha ai.
E absurde këtë deklaratë të konjufcës, e quajti dhe Adem Grabovci.
“ Se për vonesat dhe pazaret që thotë shefi i grupit parlamentar është absurde”, tha ai.
E kritika pati dhe deputetja e VV-së Besa Baftiu, e cila tha se Adem Grabovci dhe dy partitë në pushtet, po duan të përfitojnë politikisht nga kjo çështje.
“Isha ndërlidh me shefin e grupit parlamentar Adem Grabovci, i cili deshi të përfitoj lidhur me me përkrahjen e specialistëve dhe specializantëve…Dy grupet në pushtet po duan të përfitojnë politikisht në këtë drejtim”, tha ajo.
E menjëherë pati reagim nga Grabovci, i cili tha se s’ka nevojë për fushatë, pasi që ai i ka votat e sigurta.
“ Është e vërtetë se këtu çdo gjë po bëhet për politikë. Por në fund të fundit në politik jemi. Kolegës së nderuar i them se nuk kam fortë nevojë me ba fushatë, sepse i kam votat e sigurta sa herë që dalim në fushatë”, tha ai.
E Baftiu tha se është e vërtetë që Grabovci i ka votat, pasi që e kanë dhe buxhetin dhe i blejnë ato.
“Grabovci tha se ne nuk kemi nevojë se i kemi votat, sa herë që del dhe i fiton votat. E dimë se mëqe e keni buxhetin i keni dhe votat. Sa herë që dilni i bleni votat”, tha ajo.
Por jo vetëm opozita. Kritika rreth politizimit të çështjes së specialistëve, kishte dhe deputetja nga radhët e LDK-së Melihate Termkolli.
“Po më bëjnë përshtypje nganjëherë përpjekjet për politizim të disa çështjeve, që mendoj se nuk është fort mirë, ne e pam këtu një përpjekjet për politizim të çështjes së specialistëve specializantëve, mendoj se nuk është hiq e arsyeshme as e nevojshme të bëhet një gjë e tillë. Thjeshtë ata njerëz nuk kanë nevojë për lëmoshë, as qeveria nuk ka asnjë arsyte të iu ofroj lëmoshë, ata njerëz i duhen këtij shteti këtij vendi për t’u punësuar”, tha ajo.
Edhe Besa Gaxherri tha se i kupton kritikat vend e pa vend të opozitës, por jo dhe ato të pozitës, e cila ishte pajtuar me të gjitha amendamentet dhe në seancë kishin kritika.
“ Mos bëni politikë ju kur të vijmë në Kuvend., ne sidomos që jemi në koalicion. Le të ia lajmë opozitës të merr rolin e vërejtjeve ose politikës. Ndërsa ne të punojmë. Kryetarët e grupeve parlamentare është dashur të merren vesh me hy në seancë të përgatitur. Spo di deputetët që janë në koalicion a vërtetë skanë diskutuar fare në grupet parlamentare, a vërtetë po bëjnë këtu politikë apo vërtetë s’dojnë me aprovu ligjin e po shkojmë në zgjedhje”, thotë ajo.
Buxheti dhe gjendja në shëndetësinë Kosovare, ka përplasur dhe kryeparlamentarin Kadri Veseli dhe deputetin Fisnik Ismaili. Kryeparlamentari Veseli i cili foli për gjendjen e rëndë në shëndetësi dhe gjendjen e specializantëve tha se gjendja në shëndetësi duhet të zgjidhet dhe se përgjegjësi për këtë duhet të marrë ky shtet, duke i trajtuar në mënyrë dinjitoze punëtorët shëndetësor.
“Nuk ka më turp për një shoqëri, për një parlament, për një Qeveri, se sa doktoret mbesin rrugëve dhe me shku me punu rojtar. 12 vjet shkollë dhe prapë rojtar. Çfarë kuadri është ai.. Këto shaka duhet me i lanë. Definitivisht duhet me mbajt përgjegjësi ju dhe ne”, tha ai.
E për fjalimin e Veselit, për gjendjen në shëndetësinë kosovare, ka reaguar deputeti Fisnik Ismaili i cili i tha Veselit se ata vet e kanë pru këtë sektor në këtë gjendje. Ndërsa i bëri thirrje ta prishin këtë koalicion, i cili e ka pru Kosovën në këtë gjendje.
“zoti kryetar i Kuvendit ju po flitni për turpin që po ndodh në Kosovë, në sistemin e shëndetësisë dhe nuk po flsini se kush e ka pru këtë sistem të shëndetësisë në këtë gjendje që shëndetësia është në gjendje kaq të rëndë kur ju e keni pru këtu. Qysh keni fytyre ju me u arsyetu, kur vet e keni pru gjendjen deri këtu. Qysh mundeni me thanë që na nuk mund me i qu fëmijët tanë nëpër spitale, ku asnjani këtu nuk i qon fëmijët e vet nëpër spitalet e Kosovës…qysh s’ju vjen turp, qysh keni fytyrë, sdi qysh keni fytyrë me nejt këtu me ndëgju dhe me u dok se kurgja, ska ndodh që 17 vjet. Bëni diçka, prishni koalicionin sot e po hyjmë në zgjedhje se qetu na keni pru”, tha ai.
E Veseli duke iu përgjigjur Ismailit tha se për prishjen e koalicionit vendosin dy partitë në pushtet dhe se kjo nuk varet nga ata.
“Fytyrën e ka secili për vete. A prishet a jo ky koalicion e vendosim ne që jemi partner të koalicionit, dhe nuk varet prej juve”, tha ai..
E deputetja Alma Lama, shfrytëzoi këtë seancë, për të mbajtur fjalimin e saj të fundit, pasi që është përzgjedhur ta përfaqësojë Kosovën si ambasadore në Itali. Ajo tha se ndihet e respektuar dhe privilegjuar që ishte pjesë e këtij Kuvendi.
“Sot mund të jetë dita e fundit që unë do ta marrë fjalën nga kjo foltore….Falënderoi të gjithë qytetarët e Kosovës, që më mundësuan të jem pjesë e këtij parlamenti, që besuan tek unë, për të më bërë përfaqësuese të këtyre dy mandateve. Ndihem e respektuar dhe privilegjuar që pata mundësi të hyjë në këtë sallë, që për mua është e shenjt. Ndihem e respektuar dhe privilegjuar që pata mundësi të punojë për të mirën e qytetarëve të Kosovës, për të arien e shtetit të ri të Kosovës, për forcimin e shtetit të sfiduar të Kosovës. Asnjëherë nuk kam bërë llogari në rrugëtimin tim politik, as për gjatësinë e këtij rrugëtimi politik”, tha ajo. /KosovaPress
