“Votimi në referendumin për “Brexit” është një vendim jetik për Britaninë e Madhe dhe për vendin është më mirë të qëndrojë brenda BE-së”.
Kështu shprehet kryeministri David Cameron në një apel televiziv përpara selisë së Downing Street, ku ka theksuar se, “dalja do të jetë e pakthyeshme”.
“Është detyra ime si shef i qeverisë të bëj zgjedhjen e duhur për të mbrojtur vendin. Mbretëria do të ketë më shumë prosperitet dhe do të jetë më e sigurt brenda BE-së”, ka thënë Cameron.
Ndërkohë, mes votuesve britanikë ka shqetësim për parregullësi gjatë referendumit. Sipas një sondazhi të YouGov, 28 për qind e tyre dyshojnë se votimi mund të trukohet.
Sipas të njëjtit sondazh, përqindja e atyre që do të votojnë euroskeptikët e Nigel Farage, Ukip, është rritur në 64 për qind.
Një tjetër shqetësim që del nga të dhënat e sondazhit është se MI5-a, shërbimi sekret i brendshëm, po bashkëpunon me qeverinë e Cameron për të mbajtur Mbretërinë në BE./Top Channel
