Ky koalicion nuk ka vota dhe nuk mund të ecë përpara. Jemi dy koncepte dhe programe të ndryshme dhe jemi bashkuar për çështje të interesit, edhe me preferencat e ndërkombëtarëve që duhej t’i kemi dy të tretat për çështjen e kalimit të Gjykatës Speciale për demarkacionin dhe asociacionin por pse jo edhe për zhvillim ekonomik por do të shkojmë në zgjedhje të jashtëzakonshme.
Kështu ka thënë në një intervistë për KosovaPress, Shukri Buja, deputeti i Partisë Demokratike të Kosovës .
“Realisht qëllimi im personal brenda partisë është që pavarësisht buxhetit se a kalon apo s’kalon vendi duhet të shkoj në zgjedhje. Për shkak se kemi të bëjmë më koalicionin e dy elefantëve si po quhen në thonjëza. Jemi dy koncepte të ndryshme, dy programe të ndryshme dhe jemi bashku për çështje të interesit edhe me preferencat e ndërkombëtarëve, që duhëj t’i kemi dy të tretat për çështjen e kalimit të Gjykatës Speciale, për demarkacionin dhe asociacionin. Janë tre çështje për të cilat kemi pas prioritetin kryesorë, por pse jo edhe për zhvillim ekonomik“, tha Buja.
Ai madje ka thënë se do të lobojë tek deputetët që ky koalicion të prishet sa më parë që është e mundur.
“Tri çështjet kryesore, njëra ka kaluar me vështirësi duke u përsëritur dy herë, ndërsa, demarkacioni dhe asociacioni, demarkacioni nuk ka kalua apo nuk i kemi votat për demarkacionin, për asociacionin do të jetë edhe më e vështirë, dhe cila është arsyeja që ne do ta kemi këtë koalicion. Realisht unë individualisht si anëtarë i këshillit drejtues të partisë dhe deputet, do të insistojë dhe do të lobojë në mesin e deputetëve që ky koalicion të prishet dhe ne të shkojmë në zgjedhje të jashtëzakonshme.”, tha Buja.
Ndërsa këtë vit, sipas tij është e vështirë të shkohet në zgjedhje, pasi duhet së paku 45 ditë të shpërbëhet Kuvendi. Mirëpo, ai tha se vendi më së largu deri në muajt mars-prill shkon në zgjedhje.
“Realisht ky vit është pak vështirë për shkak se është kohë shumë e shkurtër, e dini se me ligj janë 45 ditë dhe brenda 45 dite në rast se shpërndahet kuvendi nuk është e lehtë më shku në zgjedhje këtë vit. Unë jam që sa më shpejt të shkojmë në zgjedhje aq më mirë, është potencuar marsi si muaj i mundshëm edhe për shkak të kohës, por jo të zgjatet në pranverë apo më vonë sepse vërtet do ta dëmtojmë Kosovën përmes këtij koalicioni.”, tha Buja.
I pyetur nëse për zgjedhje të parakohshme kanë marrë aprovimin e ndërkombëtarëve, Buja ka thënë se ata zakonisht japin sugjerime dhe se ato merren edhe si vendime.
“Nuk e di këtë çështje, është çështje e kryetarit të partisë por ju e dini që në praktikë ata japin sugjerime dhe ato sugjerime ne gjithmonë i marrim si vendime”, tha Buja.
